पुणे, ता. १४ ः घरफोडी करणाऱ्या एका कुख्यात गुन्हेगाराला सिंहगड रोड पोलिस ठाण्याच्या पोलिस तपास पथकाने अटक करत त्याच्याकडून आठ गुन्ह्यांची उकल केली. त्याने घरफोडीतील चोरीच्या पैशांमधून एक मोटारदेखील खरेदी केली असल्याचे तपासातून समोर आले आहे. पोलिसांनी त्याच्याकडून मोबाइल व मोटारीसह असा १४ लाख ७५ हजारांचा ऐवज जप्त केला आहे.
रेवण ऊर्फ रोहन बिरू सोनटक्के (वय २४, रा. दिघी, भोसरी) असे अटक करण्यात आलेल्याचे नाव आहे. त्याच्याकडून सिंहगडमधील चार, उत्तमनगरमधील दोन आणि विमानतळ व भारती विद्यापीठ पोलिस ठाण्याच्या हद्दीतील प्रत्येकी एक अशा आठ गुन्ह्यांची उकल झाली आहे. ही कारवाई वरिष्ठ निरीक्षक दिलीप दाईंगडे यांच्या मार्गदर्शनाखालील पथकाने केली आहे. शहरात घरफोड्या करणाऱ्या चोरट्यांनी धुमाकूळ घातला आहे. सिंहगड रोड परिसरातील आनंदनगर भागातदेखील एक बंद फ्लॅट फोडून चोरट्यांनी लाखो रुपयांचा ऐवज चोरून नेला होता. गुन्ह्याचा तपास सुरू होता. उपनिरीक्षक संतोष भांडवलकर व त्यांचे पथक चोरट्यांची माहिती काढत होते. पोलिसांनी या भागातील सर्व सीसीटीव्ही पडताळले. यामधून चोरट्याची माहिती घेत असताना पोलिस अंमलदार देवा चव्हाण, राहुल ओलेकर, नीलेश भोरडे यांना माहिती मिळाली की, घरफोडी करणारा आरोपी हा दिघी रोड परिसरात थांबलेला आहे. त्यानुसार पथकाने त्याला अटक केली.