पुणे, ता. १३ : शहरातील पुणे-सातारा रस्ता, कोंढवा आणि फुरसुंगी परिसरात एकाच दिवशी तीन अपघातांमध्ये मोटारचालकासह दोन पादचाऱ्यांचा मृत्यू झाला. या प्रकरणी पर्वती, कोंढवा आणि फुरसुंगी पोलिस ठाण्यात गुन्हे दाखल करण्यात आले आहेत.
पोलिसांनी दिलेल्या माहितीनुसार, कात्रजहून स्वारगेटकडे निघालेल्या भरधाव पीएमपी बसची पुणे-सातारा रस्त्यावर तावरे कॉलनीजवळ बीआरटी मार्ग ओलांडणाऱ्या पादचाऱ्याला धडक बसली. या अपघातात विकी बसवराज कोलते (वय ३०, रा. डॉ. बाबासाहेब आंबेडकरनगर, सातारा रस्ता) या तरुणाचा मृत्यू झाला. शनिवारी (ता. ११) सायंकाळी साडेसात वाजण्याच्या सुमारास हा अपघात झाला. याबाबत पोलिस अंमलदार ज्ञानेश्वर शिंदे यांनी पर्वती पोलिस ठाण्यात फिर्याद दिली आहे. त्यानुसार पीएमपी बसचालक सुदर्शन निवृत्ती तांदळे (वय २५, रा. आंबेगाव बुद्रुक) याच्याविरुद्ध गुन्हा दाखल करण्यात आला आहे.
भरधाव रिक्षाची मोटारीला धडक बसल्याने मोटारचालकाचा मृत्यू झाला. ही घटना कोंढव्यातील ‘एनआयबीएम’ रस्त्यावर शुक्रवारी रात्री साडेअकराच्या सुमारास घडली. प्रसाद प्रल्हाद कुलकर्णी (वय २६, रा. महेश सोसायटी, बिबवेवाडी) असे मृत्युमुखी पडलेल्या मोटारचालकाचे नाव आहे. विरुद्ध दिशेने वेगाने आलेल्या रिक्षाने दिलेल्या धडकेत त्यांचे मोटारीवरील नियंत्रण सुटले. गंभीर जखमी अवस्थेत त्यांना रुग्णालयात दाखल करण्यात आले; परंतु उपचारादरम्यान त्यांचा मृत्यू झाला. या प्रकरणी मित्र सम्मेद पाटील यांनी फिर्याद दिली आहे. त्यानुसार कोंढवा पोलिसांनी रिक्षाचालकाविरुद्ध गुन्हा दाखल केला आहे.
अन्य एका अपघातात भरधाव वाहनाची धडक बसल्याने पादचाऱ्याचा मृत्यू झाला. ही घटना हडपसर-सासवड रस्त्यावर फुरसुंगी भागात शुक्रवारी पहाटे सव्वाचारच्या सुमारास घडली. गणेश रमेश बोराळे (वय २५, रा. भेकराईनगर, हडपसर) असे मृत्युमुखी पडलेल्या तरुणाचे नाव आहे. अपघातानंतर वाहनचालक पसार झाला असून, पोलिसांनी त्याच्याविरुद्ध गुन्हा दाखल केला आहे. याप्रकरणी पोलिस अंमलदार निखिल पवार यांनी फुरसुंगी पोलिस ठाण्यात फिर्याद दिली आहे.