पुणे, ता. २२ : ‘‘वैयक्तिक शेतीपेक्षा समूह शेतीच्या माध्यमातून शेतकऱ्यांना बियाणे, खते, कर्ज, विमा आणि बाजारपेठ मिळवून देणे शक्य होत आहे. हीच शेतकरी उत्पादक कंपनीमागील संकल्पना असून, समूह शेतीतूनच शाश्‍वत कृषी विकास शक्य आहे,’’ असे प्रतिपादन महाराष्ट्र कृषी शिक्षण व संशोधन परिषदेचे महासंचालक रावसाहेब भागडे यांनी केले.
सारथी व महाराष्ट्र सहकार विकास महामंडळ यांच्या वतीने आयोजित शेतकरी उत्पादक कंपनी संचालक मंडळ व मुख्य कार्यकारी अधिकारी प्रशिक्षण कार्यक्रमाच्या समारोपप्रसंगी ते बोलत होते. या वेळी महामंडळाचे व्यवस्थापकीय संचालक मंगेश तिटकारे, कृषी परिषदेचे संचालक (संशोधन) डॉ. किशोर शिंदे, डॉ. दिलीप वैरागडे, दिगंबर साबळे आदी उपस्थित होते.
भागडे म्हणाले, ‘‘शेतकरी उत्पादक कंपन्या म्हणजे शेतकऱ्यांना एकत्र आणून त्यांची आर्थिक, संसाधनात्मक आणि व्यवस्थापनात्मक ताकद वाढवण्याचे एक प्रभावी माध्यम आहे. या कंपन्यांच्या माध्यमातून शेतकऱ्यांना नवीन बाजारपेठांमध्ये प्रवेश मिळतो, नफ्यात वाढ होते आणि त्यांची आर्थिक स्थिती भक्कम होते.’’
या पाचदिवसीय निवासी प्रशिक्षण कार्यक्रमात आठ जिल्ह्यांतील २७ शेतकरी उत्पादक कंपन्यांनी सहभाग नोंदवला. शेतीसंबंधित व्यवस्थापन, बाजारपेठ प्रवेश, कृषिमाल प्रक्रिया, निर्यात धोरण या बाबींवर मार्गदर्शन करण्यात आले. प्रास्ताविक दिगंबर साबळे यांनी, तर मयूर पवार यांनी सूत्रसंचालन केले, तर हेमंत जगताप यांनी आभार मानले.

शेतकरी कंपन्यांसाठी नियमित प्रशिक्षण
महाराष्ट्र सहकार विकास महामंडळाचे व्यवस्थापकीय संचालक मंगेश तिटकारे म्हणाले, ‘‘राज्यभरातील विविध जिल्ह्यांमध्ये शेतकरी उत्पादक कंपन्यांसाठी निविष्ठा सुविधा व प्रशिक्षण कार्यक्रम नियमितपणे राबवले जातात. याशिवाय कृषिमाल निर्यात प्रशिक्षणाचा महत्त्वाकांक्षी प्रकल्पही राबवला जात आहे. शेतकऱ्यांनी महामंडळाच्या संकेतस्थळावर भेट देऊन याचा लाभ घ्यावा.’’