पुणे, ता. २१ : संतश्रेष्‍ठ ज्ञानेश्‍वर महाराज व जगद्‍‍गुरू तुकाराम महाराजांच्‍या पालख्यांचे पुण्‍यभूमीत आगमन झाल्‍यानंतर त्‍या मंदिरात विसावल्‍यापासून पुणेकरांनी शनिवारी दर्शनाचा मुहूर्त साधत दोन्ही पादुकांच्‍या चरणी नतमस्‍तक झाले. शुक्रवारी मध्‍यरात्रीपासूनच पेठ परिसरातील रस्‍ते भक्तिरसात न्हाऊन निघाले होते. गेल्‍यावर्षीच्‍या तुलनेत यंदा भाविकांची गर्दी जास्‍त असल्‍याची माहिती मंदिराच्‍या विश्‍वस्‍तांनी दिली.
माऊलींची पालखी शुक्रवारी रात्री भवानी पेठेतील विठोबा मंदिरात, तर नाना पेठेतील निवडुंगा विठोबा मंदिरात तुकोबांची पालखी मुक्कामासाठी विसावली. तेव्‍हापासूनच पुणेकरांनी दर्शनासाठी गर्दी केसी होती. नाना पेठ, भवानी पेठेसह रविवार पेठ, गणेश पेठेतील अंतर्गत रस्‍ते भाविकांनी फुलून गेले होते. तर शिवाजी महाराज रस्‍ता, लक्ष्मी रस्‍ता देखील भरून गेला होता. शनिवारी दिवसभर बुधवार पेठेतील रस्‍त्‍यांवर तसेच दगडूशेठ हलवाई मंदिर परिसरात भाविकांची प्रचंड गर्दी होती. वारीचे हे आध्यात्मिक व भक्तिपूर्ण चित्र पाहताना पुणे शहर पुन्हा एकदा संतांची नगरी बनल्याचा अनुभव प्रत्येक पुणेकराला आला.
दर्शनासाठी रांगा
तुकोबांच्या दर्शनासाठी भाविकांनी एक ते दीड किलोमीटरपासून रांगा लावल्‍या होत्‍या. महिलांसाठी वेगळी तर पुरुषांसाठी वेगळी रांग लागलेली होती. त्‍याचबरोबर मुखदर्शन करण्‍यासाठीही भाविक मंदिराच्‍या समोर गर्दी करत होते व ती छबी आपल्‍या मोबाईलमध्‍ये टिपत होते. ही गर्दी नियंत्रणात आणण्‍यासाठी मदत केंद्रावरील पोलिस प्रयत्‍न करत होते. त्‍याचबरोबर ज्ञानोबांच्‍या दर्शनासाठी देखील भाविकांनी रांगा लावल्‍या होत्‍या. दोन्ही ठिकाणी पादुकांचे दर्शन घेण्‍यासाठी भाविकांना चार ते पाच तास लागत होते.
साधला खरेदीचा मुहूर्त
माऊली व तुकोबांच्या पादुकांचे दर्शन घेऊन बाहेर पडल्‍यानंतर भाविकांनी तेथील दुकानांमध्‍ये खरेदीचा मुहूर्त साधला. किरकोळ वस्‍तू विक्रेते देखील वस्‍तूंवर सवलती देत होते. महिलांसाठीचे सौंदर्य प्रसाधने, खेळण्यांची मोठ्या प्रमाणात विक्री झाली. तसेच रहाट पाळणे, रेल्वे व मेट्रोत बसण्‍याचा आनंद बच्‍चेकंपनीने लुटला.
भाविकांसाठी चोख व्यवस्था
पुण्यातील मंदिर परिसर, धर्मशाळा आणि शाळांमध्ये वारकऱ्यांच्‍या विश्रांतीची व्यवस्था करण्यात आली होती. त्‍याचबरोबर परिसरातील नेवरेकर कुटुंबीयांनी भाविकांचे मोबाईल चार्जिंग करण्‍यासाठी मोफत व्यवस्था केली होती. एकाचवेळी ३४ मोबाईल चार्ज होण्‍याची व्यवस्था केली होती.
सकाळी पादुकांची पूजा झाली. यावेळी विश्‍वस्‍त किशोर बाबर, विशाल धनवडे, आशिष शहा आदी उपस्थित होते. गेल्‍यावर्षीच्‍या तुलनेत यंदा भाविकांची संख्‍या जास्‍त आहे. रविवारी सकाळी पाद्यपूजा होणार असून अभंग गायन होऊन सकाळी ७ वाजता पालखी मार्गस्‍थ होईल.
- आशिष पाध्‍ये,
विश्‍वस्‍त, निवडुंगा विठोबा मंदिर देवस्‍थान
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.