पुणे, ता. २२ : खोटी कागदपत्रे सादर करणे, त्याच्या आधारे दुबार जमिनी लाटणे, मोबदला मिळाल्यानंतरही पुन्हा-पुन्हा अर्ज करणे आदी गोष्टींना आता आळा बसणार आहे. वरसगाव आणि पानशेत प्रकल्पातंर्गत बाधित आणि मोबदला मिळालेल्या सर्व प्रकल्पग्रस्तांच्या कागदपत्रांचे अक्षय अभिलेख या योजनेतंर्गत डिजिटायझेशन करून संकेतस्थळावर टाकण्यात येणार आहे. राज्यातील अशा प्रकारे पहिल्यांदाच पुणे जिल्हा प्रशासनाकडून आता प्रयोग राबविण्यात आला आहे.
यापूर्वी दौंड येथे बोगस जमिनी वाटपाचे प्रकरण उघडकीस आले होते. या प्रकरणामध्ये काही लाभार्थ्यांना दुबार जमिनींचे वाटप करण्यात आल्याबरोबरच लाभार्थ्यांच्या नावावर दुसऱ्याने मोबदला घेतल्याचे दिसून आले होते. त्या पार्श्‍वभूमीवर जिल्हा प्रशासनाने हा निर्णय घेतला आहे.
जिल्ह्यातील या सर्व प्रकल्पांची व त्यातील बाधितांची यादी तसेच त्यांना देण्यात आलेला मोबदला याची एकत्रित माहिती करून संकेतस्थळावर टाकण्यात येणार आहे. ती एका क्लिकवर उपलब्ध करून देण्यात येणार आहे. त्यामुळे एखादा प्रकल्पग्रस्त जिल्हाधिकारी कार्यालयात मोबदल्यासाठी आल्यास तो बाधित आहे का, यापूर्वी मोबदला घेतला आहे का, याची माहिती तत्काळ उपलब्ध होणार आहे. तसेच कोणी दुबार लाभ घेतला असेल, तर त्यांची माहितीदेखील जिल्हा प्रशासनाला मिळणार आहे. यातून सरकारची फसवणूकही टळणार आहे. तसेच मोबदला मिळाला नसल्यास संबंधिताला मोबदला देण्याची कार्यवाहीसुद्धा करण्यात येणार आहे. अनेकदा काही बनावट प्रकल्पग्रस्त खोट्या कागदपत्रांच्या आधारे दुबार लाभ लाटण्याचा प्रयत्न करतात. अशांनाही आळा बसणार आहे.

महत्त्वाचे
- पहिल्या टप्प्यात कुकडी, वरसगाव, पानशेत आणि चासकमान या चार प्रकल्पांमधील बाधितांची माहिती एका क्लिकवर उपलब्ध होणार
- त्यामध्ये वरसगाव आणि पानशेत या दोन प्रकल्पांच्या सुमारे ७६ हजार कागदपत्रांची माहिती अक्षय अभिलेख या संकेतस्थळावर अपलोड करण्यात आली
- दुसऱ्या टप्प्यात अन्य १७ प्रकल्पांचा समावेश
- पुणे जिल्ह्यात २१ सिंचन प्रकल्प आहेत. या सर्व प्रकल्पांचे भूसंपादन तसेच वाटप आदेशाचेही डिजिटायझेशन करण्यात येत असून, त्यामुळे प्रकल्पग्रस्तांची अचूक माहिती उपलब्ध होणार
- आतापर्यंत चारही प्रकल्पांची २ लाख ३८ हजार १५८ कागदपत्रांची स्कॅनिंग पूर्ण
- वरसगाव आणि पानशेत प्रकल्पातील कागदपत्रांचे स्कॅनिंग करून त्याची संपूर्ण माहितीही अपलोड
- वरसगावच्या १७ हजार ७०२, तर पानशेतच्या ५८ हजार ७७७ कागदपत्रांची माहिती अपलोड
- चासकमान आणि कुकडी प्रकल्पांच्या कागदपत्रांची माहिती अपलोड करण्याचे काम येत्या महिनाभरात पूर्ण होणार
- पहिल्या टप्प्यात मोठ्या प्रकल्पांचे काम हाती
- दुसऱ्या टप्प्यात कमी भूसंपादन आणि कागदपत्रे असलेल्या प्रकल्पांचे काम हाती घेणार

अक्षय अभिलेख या योजनेतंर्गत पुणे जिल्ह्यातील सर्व प्रकल्पग्रस्तांच्या कागदपत्रांचे डिजिटायझेशन करून ते संकेतस्थळावर टाकण्यात येणार आहे. राज्यात अशा प्रकारे राबविण्यात येणारा हा पहिलाच प्रकल्प आहे.
- जितेंद्र डुडी, जिल्हाधिकारी, पुणे

जिल्ह्यातील प्रकल्पग्रस्तांची संख्या - १८ हजारांहून अधिक
एकूण प्रकल्पांची संख्या - २१