पुणे, ता. २३ : आंतरराष्ट्रीय योग्य दिनानिमित्त शहरातील विविध शाळा, महाविद्यालय, गणेश मंडळ, स्वयंसेवी संस्था तसेच विविध वैद्यकीय संस्थांतर्फे योग्य प्रत्यक्षिकांचे उपक्रम झाले. या उपक्रमांना विद्यार्थी आणि नागरिकांनी उत्स्फूर्त प्रतिसाद दिला. यावेळी विद्यार्थ्यांनी योग साधनेतील विविध आसने केली आणि निरोगी आरोग्यासाठी योग साधनेचे महत्त्व व त्याची संपूर्ण माहिती जाणून घेतली.

नूतन मराठी विद्यालय
बाजीराव रस्त्यावरील नूतन मराठी विद्यालयात साईनाथ मंडळ ट्रस्ट, वीर शिवराज मंडळ यांच्यातर्फे योग प्रात्यक्षिक झाले. विद्यालयातील सुमारे ५०० विद्यार्थ्यांनी याचा लाभ घेतला. शाळेचे माजी विद्यार्थी योग गुरू विठ्ठल कडू, साईनाथ मंडळ ट्रस्टचे अध्यक्ष पीयूष शहा, वीर शिवराज मंडळाचे अध्यक्ष किरण सोनीवाल, प्रशाला समितीचे अध्यक्ष पराग ठाकूर, नूमवि प्रशाला व कनिष्ठ महाविद्यालयाचे मुख्याध्यापक प्रकाश कांबळे, उपमुख्याध्यापिका संगीता काळे आदी उपस्थित होते.

गिरमे विद्यालय
वानवडीतील श्री हरिभाऊ बळवंतराव गिरमे माध्यमिक उच्च माध्यमिक विद्यालयात निरोगी आणि उत्साही आयुष्यासाठी योगासनांचे व प्राणायामाचे महत्त्व सांगत योगशिक्षक आनंद लोखंडे यांनी शाळेतील सर्व विद्यार्थ्यांना व शिक्षकांना मार्गदर्शन केले. यावेळी प्राचार्य विजय गोरे, प्राजक्ता कांबळे उपस्थित होते. यावेळी व्यसनविरोधी प्रतिज्ञा घेण्यात आली.

ज्ञानगंगा इंग्लिश मीडियम स्कूल
झील एज्युकेशन सोसायटीच्या ज्ञानगंगा इंग्लिश मीडियम स्कूलमध्ये योगा दिवस साजरा झाला. यावेळी मुख्याध्यापिका एलिझाबेथ डेव्हिड, माजी नगरसेविका ज्योती गोसावी आदी उपस्थित होत्या.

टीजीएच ऑन्कोलाइफ कॅन्सर सेंटर
योग हा केवळ एक सराव नाही, तर तो एक जीवनशैलीचा भाग असून नियमित योग्याभ्यासाचा सल्ला टीजीएच ऑन्कोलाइफ कॅन्सर सेंटरमध्ये देण्यात आला. यावेळी रुग्णालयाच्या डॉ. ज्योती मेहता, डॉ. संतोष साहू, डॉ. प्रिया अग्रवाल यांच्यासह रुग्णालयातील कर्मचारी व रुग्ण उपस्थित होते.

हिंदुस्थान अँटिबायोटिक्स प्राथमिक शाळा
डेक्कन एज्युकेशन सोसायटी संचलित हिंदुस्थान अँटिबायोटिक्स प्राथमिक शाळेत क्रीडा शिक्षक सोनाली घोरपडे यांच्या नेतृत्वाखाली मुलांनी सूर्यनमस्कार व विविध आसने केली. विद्यार्थ्यांना आसनांचे फायदे सांगण्यात आले. यावेळी सुरेखा जाधव, शाळा समितीचे अध्यक्ष खेमराज रणपिसे उपस्थित होते.

बायोस्फिअर्स संस्था
‘माऊली हरित अभियाना’ अंतर्गत बायोस्फिअर्स संस्थेच्या संकल्पनेतून सिद्धबेट (आळंदी) येथे ‘योगवल्ली-योगिनी समवेत योग’ असा अनोखा उपक्रम झाला. याप्रसंगी साधकाश्रमाचे डॉ. यशोधन महाराज साखरे, कीर्तनकार हरिदास शास्त्री पालवे, स्पेन येथील निशामाह पिलर संतोस, संस्थेचे संस्थापक, पर्यावरण शास्त्रज्ञ डॉ. सचिन पुणेकर, संत-साहित्याचे लेखक दत्तात्रेय महाराज गायकवाड उपस्थित होते.

म.ए.सो. भावे प्राथमिक शाळा
सदाशिव पेठ येथील म.ए.सो. भावे प्राथमिक शाळेत विद्यार्थी व शिक्षकांनी सूर्यनमस्कार केले. शिक्षक व विद्यार्थ्यांनी रोज सूर्यनमस्कार घालण्याचा व योगासने करण्याचा संकल्प केला. यावेळी मुख्याध्यापिका प्रतिभा गायकवाड, उपमुख्याध्यापिका वृषाली ठकार उपस्थित होत्या.

अ‍ॅड. शार्दुलराव सुधाकरराव जाधवर विधी महाविद्यालय
अ‍ॅड. शार्दुलराव सुधाकरराव जाधवर विधी महाविद्यालय पुणे यांच्यातर्फे एस.ओ.एस. बालग्राम, येरवडा येथे विशेष योग सत्र पार पडले. याप्रसंगी योग प्रशिक्षक नेहा नाटेकर यांच्या मार्गदर्शनाखाली विद्यार्थ्यांनी ताडासन, वृक्षासन, भुजंगासन, अनुलोम-विलोम आदी योगासने केली.