पुणे, ता. २३ ः आंतरराष्ट्रीय कृष्णभावनामृत संघ-इस्कॉनतर्फे जगन्नाथ रथयात्रा सोहळा आयोजित करण्यात आला आहे. हा सोहळा रविवार (ता. २९) पार पडणार असून, त्याची सुरुवात दुपारी एक वाजता टिळक रस्त्यावरील स. प.महाविद्यालय येथून होणार आहे, अशी माहिती इस्कॉन मंदिराचे प्रवक्ते जनार्दन चितोडे यांनी सोमवारी (ता. २३) पत्रकार परिषदेत दिली.
रथयात्रेचे उद्‍घाटन केंद्रीय नागरी विमान वाहतूक राज्यमंत्री मुरलीधर मोहोळ, खासदार मेधा कुलकर्णी, उच्च आणि तंत्र शिक्षण मंत्री चंद्रकांत पाटील, आमदार हेमंत रासने, सुनील कांबळे, योगेश टिळेकर, इस्कॉन संस्थेचे संन्यासी लोकनाथ स्वामी, इस्कॉन मंदिराचे अध्यक्ष राधेश्याम प्रभू यांच्या हस्ते होणार आहे.
ओरिसामधील जगन्नाथ पुरी येथे रथयात्रा मोठ्या उत्साहात साजरी होते. त्याच पार्श्वभूमीवर पुण्यामध्ये रथयात्रा होणार आहे. रथयात्रेच्या दिवशी इस्कॉन कात्रज-कोंढवा रस्ता येथील भगवान जगन्नाथ, बलराम आणि सुभद्रा यांना खास दर्शनासाठी रथावर आणले जाते. पत्रकार परिषदेला इस्कॉन मंदिराचे उपाध्यक्ष संजय भोसले, रथयात्रेचे समन्वयक अनंतगोप प्रभू आणि जनसंपर्क प्रमुख प्रसाद कारखानीस उपस्थित होते.