पुणे, ता. १६ ः कुख्यात गुंड नीलेश घायवळ टोळीतील सदस्य अजय सरोदे भाजीविक्रेता असताना, त्याला पिस्तूल आणि काडतुसे खरेदी करण्यासाठी कोणी आर्थिक मदत केली, याचा तपास पुणे पोलिसांकडून केला जात आहे. न्यायालयाने त्याला १८ डिसेंबरपर्यंत पोलिस कोठडी सुनावली आहे.
कोथरूड गोळीबार प्रकरणात परदेशात पळून गेलेल्या नीलेश घायवळसह एकूण सतरा आरोपींविरोधात महाराष्ट्र संघटित गुन्हेगारी नियंत्रण कायद्यानुसार (मकोका) गुन्हा दाखल करण्यात आला आहे. या प्रकरणात आरोपी अजय महादेव सरोदे (वय ३२, रा. आझादनगर, कोथरूड) याला पोलिसांनी शुक्रवारी अटक केली आहे. पोलिस कोठडीची मुदत संपल्याने त्याला न्यायालयासमोर हजर करण्यात आले होते. सरोदेकडे चारशे काडतुसे आणि परवानाधारक पिस्तूल सापडले असून, बैलपोळ्याच्या दिवशी नीलेश घायवळ व त्याच्या साथीदारांसमवेत त्याने गोळीबाराचा सराव केल्याचे तपासात उघड झाले आहे.
या प्रकरणात राज्य सरकारची बाजू मांडण्यासाठी नियुक्त विशेष सरकारी वकील अॅड. शिशिर हिरे यांनी आरोपी सरोदेच्या पोलिस कोठडीत वाढ करण्याची मागणी केली. नीलेश घायवळचा अहिल्यानगरमधील सोनेगाव येथे बंगला असून, तेथे बैलपोळ्याच्या दिवशी घायवळ व सरोदेने अन्य साथीदारांसह गोळीबाराचा सराव केल्याचे तपासात निष्पन्न झाले आहे. सरोदेचा भाजी विक्रीचा व्यवसाय आहे. त्याच्याकडे सापडलेल्या पिस्तूल व काडतुसांच्या खरेदीसाठी त्याला कोणी आर्थिक मदत केली, याबाबत आरोपीची चौकशी करायची आहे. आरोपींनी संघटित गुन्हेगारी करून लाटलेल्या स्थावर व जंगम मालमत्तांचा तपास करायचा आहे. त्यासाठी आरोपीच्या पोलिस कोठडीत वाढ करण्याची मागणी हिरे यांनी केली.