पुणे, ता. १६ : मे आणि जूनमध्ये ‘शिक्षक अभियोग्यता व बुद्धीमत्ता चाचणी- २०२५’ परीक्षा दिलेल्या उमेदवारांना स्व-प्रमाणपत्र तयार करण्यासाठी शिक्षक भरतीच्या पोर्टलवर सुविधा देण्यात आली आहे. उमेदवारांना स्व-प्रमाणपत्र पूर्ण करण्यासाठी २९ डिसेंबरपर्यंत मुदत दिली आहे.
‘शिक्षक अभियोग्यता व बुद्धीमत्ता चाचणी २०२५’ ही परीक्षा २७ ते ३० मे आणि २ ते ५ जून दरम्यान ऑनलाइन पद्धतीने घेण्यात आली. या चाचणीसाठी दोन लाख २८ हजार ८०८ उमेदवारांनी नोंदणी केली होती. ही चाचणी दिलेल्या उमेदवारांना स्व-प्रमाणपत्र तयार करण्यासाठी पोर्टलवर सुविधा दिली आहे. टीईटी आणि सीटीईटीच्या माहितीमध्ये तफावत येईल, अशा उमेदवारांना राज्यातील त्यांनी निवडलेल्या जिल्ह्याच्या शिक्षणाधिकारी (प्राथमिक/माध्यमिक) यांच्याकडून उमेदवार आपणच असल्याचे सिद्ध करण्याचा विनंती अर्ज, ओळखीचे पुरावे, संबंधित कागदपत्रे यांसह संपर्क साधण्यात याव्यात, अशा सूचना शिक्षण विभागाने दिल्या आहेत. उमेदवारांना त्यांच्या लॉगिनवर ‘रिक्वेस्ट फॉर चेंज इन डेटा’ या मेनुअंतर्गत सुविधा दिली आहे. उमेदवारांना त्यांच्या सोयीचा जिल्हा निवडता येणार आहे, असे शिक्षण विभागाने स्पष्ट केले आहे.