पुणे, ता. १९ ः ‘‘आम्ही पक्षाला लोकसभा-विधानसभा निवडणुकीत खंबीर साथ दिली. प्रतिकूल परिस्थितीमध्ये पक्षासाठी आम्ही संघर्ष केला. त्यामुळे महापालिका निवडणुकीमध्ये फक्त पक्षाच्या निष्ठावंतांनाच संधी द्या, महाविकास आघाडीलाच प्राधान्य द्या,’’ अशी आग्रही मागणी राष्ट्रवादी काँग्रेस शरदचंद्र पवार पक्षाच्या कार्यकर्त्यांनी थेट प्रदेशाध्यक्षांकडे केली.
महापालिका निवडणुकीसाठी राष्ट्रवादी काँग्रेस शरदचंद्र पवार पक्षातील इच्छुक उमेदवारांशी प्रदेशाध्यक्ष शशिकांत शिंदे यांनी शुक्रवारी संवाद साधला. उमेदवारीपासून ते आघाडीबाबत कार्यकर्त्यांची नेमकी काय मते आहेत, हे शिंदे यांनी थेट कार्यकर्त्यांशी संवाद साधून जाणून घेतले.
पक्षाच्या काही कार्यकर्त्यांनी अजित पवार यांच्या राष्ट्रवादी काँग्रेस पक्षासमवेत जाण्याबाबतची आपली भूमिका मांडली, तर बहुतांश कार्यकर्त्यांनी महाविकास आघाडीबरोबरच पक्षाने महापालिका निवडणूक लढवावी, असा आग्रह धरला. तर काही इच्छुकांनी उमेदवारीबाबत आली भूमिका रोखठोक मांडली. ‘‘पक्षाचे विभाजन झाल्यानंतर आम्ही परिस्थितीशी संघर्ष करत पक्षाला यशापर्यंत पोहोचविले. आता महापालिका निवडणुकीच्या वेळी दोन्ही काँग्रेस एकत्र आणण्याची चर्चा करून पक्षातील प्रस्थापितांना उमेदवारी देण्यासाठी प्रयत्न होत आहे. त्यामुळे पक्षासाठी निष्ठेने काम करणाऱ्यांवर अन्याय होईल. हा अन्याय होऊ देऊ नका,’’ अशी मागणी केली. दरम्यान, कार्यकर्त्यांची मते जाणून घेतल्यानंतर त्याबाबतची माहिती वरिष्ठ पातळीवर पोहोचवली जाईल, त्यानंतर योग्य निर्णय घेतला जाईल, असे आश्‍वासन शिंदे यांनी कार्यकर्त्यांना दिले.
------------------