पुणे, ता. १९ : केंद्रीय शिक्षण मंत्रालय आणि राज्य सरकारचा शालेय शिक्षण विभाग यांच्या वतीने अकराव्या राष्ट्रीय कला उत्सवाचा उद्‌घाटन सोहळा शनिवार (ता. २०) यशवंतराव चव्हाण विकास प्रशासन प्रबोधिनी (यशदा) येथे सकाळी साडेदहाच्या सुमारास होणार आहे. यंदाचा कला उत्सव महाराष्ट्र शासनाच्या शालेय शिक्षण विभागाच्या समन्वयाने आणि श्री शिवछत्रपती क्रीडा संकुलाच्या सहकार्याने शनिवार (ता. २०) ते मंगळवार (ता. २३) या कालावधीत ‘यशदा’ येथे होणार आहे.
या उत्सवाच्या उद्‌घाटनप्रसंगी केंद्रीय शिक्षा मंत्रालयाचे अतिरिक्त सचिव आनंदराव पाटील, महाराष्ट्राच्या शालेय शिक्षण विभागाचे प्रधान सचिव रणजित सिंह देओल, राज्याचे शिक्षण आयुक्त सचिंद्र प्रताप सिंह, राष्ट्रीय शैक्षणिक संशोधन व प्रशिक्षण परिषदेचे (एनसीईआरटी) संचालक दिनेश प्रसाद संकलानी, राज्य शैक्षणिक संशोधन व प्रशिक्षण परिषदेचे (एससीईआरटी) संचालक राहुल रेखावार आदी उपस्थित राहणार आहेत, अशी माहिती ‘एनसीईआरटी’च्या विभाग प्रमुख प्रा. ज्योत्स्ना तिवारी यांनी आयोजित पत्रकार परिषदेत दिली. यावेळी ‘एनसीईआरटी’च्या कला उत्सवाच्या राष्ट्रीय समन्वयक शर्वरी बॅनर्जी, डिजिटल शिक्षण’ संचालक हरिकुमार, शिक्षण मंत्रालय संचालक शिबदास सरकार, बालभारतीच्या संचालक अनुराधा ओक, ‘एससीईआरटी’च्या सहसंचालक डॉ. कमलादेवी आवटे, ‘किशोर’चे कार्यकारी संपादक किरण केंद्रे आदी उपस्थित होते.
‘एनसीईआरटी’मार्फत २०१५ पासून दरवर्षी हा महोत्सव आयोजित करण्यात येतो. यंदाचा ‘अकरावा राष्ट्रीय कला उत्सव २०२५’ हा विद्यार्थ्यांचे शिक्षण अधिक सर्जनशील, अभिव्यक्तीपूर्ण आणि आनंददायी बनवण्याच्या उद्देशाने आयोजित केला जातो. उत्सवात देशातील सर्व राज्ये, केंद्रशासित प्रदेशांसह केंद्रीय विद्यालये, नवोदय विद्यालये आणि एकलव्य मॉडेल निवासी शाळा येथील विद्यार्थी, शिक्षक तसेच प्रतिनिधी सहभागी होणार आहेत. यंदा उत्सवात देशभरातून ४०५ मुले आणि ५१३ मुली असे एकूण ९१८ विद्यार्थी, १०८ शिक्षक आणि ३६ परीक्षक यांचा सहभाग असणार आहे. उत्सवामध्ये गायन, वादन, नृत्य, नाटक, दृश्यकला, पारंपारिक कथाकथन अशा १२ कला प्रकारांचा समावेश असून त्यांचे सादरीकरण होईल, असे प्रा. तिवारी यांनी सांगितले.

विजेत्या विद्यार्थ्यांसाठी ‘प्रतिभा संवर्धन’ शिबिर
‘‘कला उत्सवातील विजेत्या विद्यार्थ्यांसाठी ‘प्रतिभा संवर्धन’ हे दहा दिवसांचे विशेष शिबिर आयोजित केले जाणार आहे. या शिबिराद्वारे विद्यार्थ्यांच्या कलांना योग्य दिशा देण्याचे आणि त्यांना त्या कलेत अधिक समृद्ध करण्यासाठी प्रयत्न केले जाणार आहेत,’’ असे प्रा. तिवारी यांनी सांगितले. ‘एनसीईआरटी’प्रमाणेच राज्यस्तरावर होणाऱ्या कला उत्सवातील विजेत्या विद्यार्थ्यांसाठी राज्यातही ‘प्रतिभा संवर्धन’ शिबिराचा उपक्रम येत्या शैक्षणिक वर्षापासून राबविण्यात येईल,’’ अशी माहिती ‘एससीईआरटी’च्या सहसंचालक डॉ. कमलादेवी आवटे यांनी दिली.

शिक्षकांसाठी ‘समृद्धी’ कार्यशाळा
कलेच्या माध्यमातून शालेय शिक्षण अधिक सुकर करण्यासाठी शिक्षकांसाठी ‘समृद्धी’ ही कार्यशाळा घेण्यात येईल. अशाप्रकारे जवळपास १८० शिक्षकांना राष्ट्रीय स्तरावरील प्रशिक्षण देण्यात येईल, असेही प्रा. तिवारी यांनी सांगितले.