पुणे, ता. २९ : ‘‘प्रभाग रचनेचे काम गोपनीय असते. अद्याप मतदार सूचीनुसार मॅपिंगचे काम सुरूदेखील झाले नसताना काही राजकीय पक्षांच्या प्रतिनिधींकडून प्रभाग रचनेसंबंधी दिशाभूल करणाऱ्‍या व अफवा पसरवणाऱ्या बातम्या पसरविल्या जात आहेत. या बातम्यांवर नागरिकांनी विश्‍वास ठेवू नये,’’ असे आवाहन अतिरिक्त महापालिका आयुक्त ओमप्रकाश दिवटे यांनी पत्रकाद्वारे केले आहे.
नगरविकास विभागाने महापालिका निवडणुकीच्या अनुषंगाने १० जून रोजी महापालिकांना प्रभाग रचनेचे आदेश दिले आहेत. यानंतर दोनच दिवसांनी प्रभाग रचनेचा कार्यक्रमही जाहीर केला असून, २३ जून रोजी या आदेशात सुधारणा करत प्रभाग रचना अंतिम करण्याचा कालावधीदेखील वाढविला आहे. नगरविकास विभागाने दिलेल्या कार्यक्रमानुसार, प्रारूप प्रभाग रचना प्रसिद्ध करणे, त्यावर हरकती सूचना मागविणे, दाखल हरकती-सूचनांवर सुनावणी घेऊन अंतिम प्रभाग रचना जाहीर होणार आहे. ही माहिती महापालिकेच्या संकेतस्थळावर आणि माध्यमांमध्येदेखील प्रसिद्ध केली जाणार आहे, असेही पत्रकात म्हटले आहे.