पुणे, ता. ३० : राष्ट्रीय महिला आयोगाकडे प्राप्त झालेल्या तक्रारींचे जलद आणि प्रभावी निराकरण करण्यासाठी आयोगाच्या अध्यक्षा विजया रहाटकर यांच्या अध्यक्षतेखाली बुधवारी (ता. २ जुलै) दुपारी १२ वाजता जिल्हाधिकारी कार्यालय, बहुउद्देशीय सभागृह, पाचवा मजला, पुणे येथे महिला जनसुनावणीचे आयोजन केले आहे, अशी माहिती जिल्हा महिला व बाल विकास अधिकारी मनीषा बिरारीस यांनी दिली.
या जनसुनावणी दरम्यान पुणे शहर व पिंपरी-चिंचवड पोलिस आयुक्तालय तसेच पुणे ग्रामीण पोलिसांशी संबंधित सन २०२३, २०२४ आणि २०२५ या वर्षांतील सुमारे ३५ प्रलंबित तक्रारींची वॉक-इन तक्रारदारांसह सुनावणी होणार आहे. राष्ट्रीय महिला आयोगाचे पथक दुपारी १२ वाजता संबंधित ठिकाणी प्राथमिक सुनावणी सुरू करणार असून, आयोगाच्या अध्यक्षा रहाटकर या दुपारी २ वाजता सुनावणी घेणार आहेत. यावेळी तक्रारदार महिलांना थेट सुनावणीस उपस्थित राहून त्यांची तक्रार लेखी स्वरूपात मांडता येणार असून पीडित वा तक्रारदार महिलांनी जनसुनावणीसाठी उपस्थित राहावे, असे आवाहनही बिरारीस यांनी केले आहे.