पुणे/सिंहगड रस्ता, ता. १ : सिंहगड रस्ता परिसरातील वडगाव येथील रेणुका नगरीमधील गजानन ज्वेलर्स दुकानात तीन चोरट्यांनी भरदिवसा शस्त्रांचा धाक दाखवत पाच तोळे सोन्याचे दागिने लुटून नेले. यावेळी चोरट्यांनी केलेल्या हल्ल्यात महिला गंभीर जखमी झाली आहे. मंगळवारी दुपारी दीडच्या सुमारास हा प्रकार घडला.
रेणुका नगरी परिसरात शंकरराव पोपट घाडगे यांचे गजानन ज्वेलर्स हे दुकान आहे. त्यांच्या पत्नी मंगल घाडगे (वय ५५) यादेखील त्यावेळी दुकानात होत्या. पाउंजाई मंदिराकडून दुचाकीवर तिघेजण हातात कोयता आणि बंदूक घेऊन आले. चोरट्यांनी चेहऱ्यावर मास्क बांधला होता. तिसराजण दुचाकीवर बाहेर उभा राहिला. चोरट्यांनी शस्त्राचा धाक दाखवून दुकानात जबरदस्तीने प्रवेश केला. त्यांनी दुकानमालक शंकर घाडगे आणि त्यांच्या पत्नी मंगल घाडगे यांना धमकावले. या वेळी मंगल घाडगे यांनी विरोध केल्याने चोरट्यांनी त्यांच्या डोक्यावर आणि दंडावर कोयत्याने वार केला. यामध्ये त्या जखमी झाल्या.
चोरट्यांनी दुकानातील शोकेस फोडून पाच सोन्याच्या चेन आणि एक नेकलेस असे साडेचार लाख रुपयांचे दागिने चोरून नेले. या वेळी शेजारील दुकानदारांनी चोरट्यांना अडवण्याचा प्रयत्न केला. मात्र, त्यांच्यावर पिस्तूल रोखून धरल्याने त्यांना काही करता आले नाही. त्यानंतर चोरटे तेथून पसार झाले.
याबाबत माहिती मिळताच परिमंडळ तीनचे पोलिस उपायुक्त संभाजी कदम, वरिष्ठ पोलिस निरीक्षक दिलीप दाइंगडे यांच्यासह पोलिसांचे पथक घटनास्थळी दाखल झाले. चोरट्यांचा शोध घेण्यासाठी सीसीटीव्ही चित्रीकरण तपासण्यात येत आहे, अशी माहिती कदम यांनी दिली. सहाय्यक पोलिस निरीक्षक समीर कदम तपास करीत आहेत.