पुणे, ता. ६ : आषाढी एकादशीनिमित्त शहरातील विविध विठ्ठल मंदिरांमध्ये दर्शनासाठी भाविकांनी रविवारी गर्दी केली होती. हरिनामाचा गजर करत, ‘सदा माझे डोळे जडो तुझी मूर्ती’ अशा भक्तिभावाने भाविक पांडुरंगाचरणी लीन झाले.
विठ्ठलवाडीतील ‘प्रति पंढरपूर’ म्हटले जाणारे विठ्ठल मंदिर, नाना पेठेतील निवडुंगा विठोबा मंदिर, भवानी पेठेतील पालखी विठोबा मंदिर, नवी पेठ विठ्ठल मंदिर, लकडी पूल विठ्ठल मंदिरासह मध्यवर्ती भागातील आणि उपनगरांतील विविध विठ्ठल मंदिरांमध्ये पहाटेपासूनच भाविकांच्या दर्शनासाठी रांगा लागल्या होत्या. परंपरेप्रमाणे महापूजा, अभिषेक आणि महाआरती झाल्यानंतर मंदिरे दर्शनासाठी खुली करण्यात आली. मंदिरांना आकर्षक पुष्पसजावट आणि विद्युत रोषणाई करण्यात आल्याने प्रसन्न वातावरण निर्माण झाले होते.
नाना पेठेतील निवडुंगा विठोबा मंदिरात विधान परिषदेच्या उपसभापती डॉ. नीलम गोऱ्हे यांच्या हस्ते महापूजा, अभिषेक आणि महाआरती करण्यात आली. यावेळी सामाजिक कार्यकर्त्या जेहलम जोशी, सुदर्शना त्रिगुणाईत, मंदिराचे विश्वस्त विशाल धनवडे आदी उपस्थित होते.
आषाढी एकादशीनिमित्त शहरात विविध अभंग गायन आणि कीर्तन कार्यक्रमांचेही आयोजन करण्यात आले होते. सायंकाळनंतर भाविक या अभंगांमध्ये रंगून गेले होते.