पुणे, ता. ८ : सावित्रीबाई फुले पुणे विद्यापीठाच्या शिक्षण आणि विस्तार विभागात २०२५-२६ या शैक्षणिक वर्षातील चार वर्षांच्या एकात्मिक बी.एस्सी. बी.एड., बी.ए. बी.एड. आणि बी.कॉम. बी.एड. अभ्यासक्रमांची प्रवेश प्रक्रिया सुरू झाली आहे. या अभ्यासक्रमासाठी केवळ ‘एनसीईटी २०२५’ (आयटीईपी) प्रवेश परीक्षा उत्तीर्ण विद्यार्थी पात्र आहेत. या अभ्यासक्रमासाठी विद्यार्थ्यांना येत्या रविवारपर्यंत (ता. १३) ऑनलाइन नोंदणी करता येणार आहे.

अभ्यासक्रमाच्या नोंदणीसाठी विद्यापीठाने https://docs.google.com/forms/d/e/1FAIpQLSenxNlrrGOoGhRR2avbGX2BfVxEPW9nZoa2zu2NfEtPvRDEnQ/viewform?usp=preview ही गुगल फॉर्म लिंक दिली आहे. प्रवेशासाठी आलेल्या अर्जांवरून अंतिम गुणवत्ता यादी १५ जुलैला सायंकाळी पाच वाजता जाहीर करण्यात येणार आहे. त्यानंतर प्रवेश प्रक्रिया सुरू होईल. प्रवेशासाठी पात्र विद्यार्थ्यांशी फोन, ई-मेल आणि व्हॉट्सअ‍ॅपद्वारे संपर्क साधला जाणार आहे. यासाठी विद्यार्थ्यांनी नोंदणी दरम्यान दिलेला मोबाईल क्रमांक बदलू नये. प्रवेश प्रक्रिया २१ जुलैपासून सुरू होणार असल्याचे विद्यापीठ प्रशासनाने कळविले आहे.

या अभ्यासक्रमात विज्ञान शाखेसाठी भौतिकशास्त्र, रसायनशास्त्र, गणित, वनस्पतिशास्त्र, प्राणिशास्त्र तर, वाणिज्य शाखेत बिझनेस ॲडमिनिस्ट्रेशन, बँकिंग ॲण्ड फायनान्स, को-ऑपरेशन ॲण्ड रूरल डेव्हलपमेंट, कॉम्पुटर ॲप्लिकेशन आणि कला शाखेत इतिहास, भूगोल, मानसशास्त्र, राज्यशास्त्र, समाजशास्त्र अशा विषयांत विशेष अभ्यासक्रम पूर्ण करता येणार आहे.