पुणे, ता. ८ : शेअर बाजारात भरघोस नफ्याचे आमिष दाखवून एका व्यावसायिकाची ५३ लाख रुपयांची फसवणूक करण्यात आल्याचा प्रकार उघडकीस आला आहे. याप्रकरणी कोंढवा पोलिस ठाण्यात दोघांविरोधात गुन्हा दाखल केला आहे.
फिर्यादी व्यावसायिक टिळेकरनगर येथील रहिवासी आहेत. ते शेअर ट्रेडिंगचा व्यवसाय करतात. त्यांनी दिलेल्या तक्रारीनुसार, सुमीत होमचंदानी (रा. कोंढवा) आणि कमल केवलरामाणी (रा. सुरत, गुजरात) यांनी २०२२ ते २०२५ या कालावधीत त्यांना गुंतवणुकीवर भरघोस परताव्याचे आमिष दाखवले. आरोपींनी सुरुवातीला विश्वास संपादन करून फिर्यादीकडून टप्प्याटप्प्याने रक्कम घेतली. त्यानंतर बनावट संदेश पाठवून त्यांना नफ्याचा बनाव केला. काही महिन्यांनी फिर्यादीने गुंतवलेली रक्कम मागितली असता, फक्त दोन लाख रुपये परत करून उर्वरित रक्कम न देता फसवणूक केली.