पुणे, ता. १० ः पत्नीने उच्च शिक्षण घेऊन स्वतःचे अस्तित्व निर्माण करावे, यासाठी पतीने आर्थिक चणचण सहन केली. स्वतःच्या खर्चाची बचत करत पत्नीला संगणक अभियांत्रिकीचे शिक्षण दिले. पत्नीला चांगली नोकरी मिळावी यासाठी आवश्यक ते सर्व प्रयत्नदेखील केले. त्यातून पत्नीला चांगल्या पगाराची नोकरी मिळाली. या दरम्यान त्यांच्यात विविध कारणांवरून वाद सुरू झाले आणि आर्थिकदृष्ट्या स्वावलंबी झाल्यानंतर पत्नीने पतीकडे पाठ फिरवली. सतत वाद घालून पतीला त्रास देण्यास सुरू केले. पत्नीच्या सततच्या त्रासाला कंटाळत पतीने अखेर घटस्फोटासाठी दावा केला. त्यात पत्नीने केलेल्या अवास्तव मागण्या फेटाळत न्यायालयाने पतीच्या बाजूने निर्णय देत त्याचा घटस्फोटाचा दावा मंजूर केला.

रेखा आणि सुरेश (नावे बदललेली) यांचा विवाह २०११ मध्ये झाला. विवाहानंतर रेखा या पुण्यात सुरेश यांच्याकडे नांदायला आल्या. त्यावेळी सुरेश हे एका खासगी महाविद्यालयात प्राध्यापक होते, तर रेखा हा गृहिणी होत्या. पत्नीने उच्च शिक्षण घेऊन नोकरी करावी. त्यातून तिचे अस्तित्व निर्माण व्हावे यासाठी सुरेश यांनी स्वतःची आर्थिक चणचण सहन करत पत्नीच्या संगणक अभियांत्रिकी शिक्षणासाठी खर्च केला. त्यानंतर दोघांना एक अपत्यही झाले. नोकरी मिळाल्यानंतर मात्र रेखाच्या स्वभावात बदल झाला. त्या सातत्याने सुरेश यांचा अपमान करत. पती व सासूशी वाद घालून त्या माहेरी राहायला गेल्या. एक वर्षानंतर त्यांनी सुरेश आणि त्यांची आई यांच्यावर कौटुंबिक हिंसाचाराचा खटला दाखल केला. तीन वर्षांनी नातेवाइकांच्या दबावाने त्यांनी पुन्हा एकत्र राहण्याचा निर्णय घेतला, मात्र काही महिन्यांतच वाद पुन्हा सुरू झाले, असे सुरेश यांनी केलेल्या दाव्यात नमूद आहे.
------------
नोकरी करत असल्याने पोटगी नाकारली
सुरेश यांनी पत्नीला समजून घेण्याचा खूप प्रयत्न केला, पण तिच्या वागणुकीत सुधारणा झाली नाही. अखेर त्यांनी येथील कौटुंबिक न्यायालयात ॲड. मीनाक्षी डिंबळे यांच्यामार्फत घटस्फोटासाठी अर्ज दाखल केला. त्यानंतर रेखा यांनी पोटगीसाठी अर्ज केला, परंतु त्या नोकरी करत असल्याने तो अर्ज न्यायालयाने फेटाळला. घटस्फोटासाठी त्यांनी अनेक जाचक अटी घातल्या. त्यामुळे त्यांच्यात समझोता झाला नाही व घटस्फोटाचा दावा चालविण्यात आला. दोन्ही बाजूंचा सखोल विचार करून, सुरेशला झालेला मानसिक व शारीरिक त्रास पाहता न्यायालयाने घटस्फोट मंजूर केला.
------------------
घटस्फोटासाठी अवास्तव मागण्या
- लाखो रुपयांची पोटगी मागितली
- मोठ्या सोसायटीत प्रशस्त घर देण्याची अपेक्षा
- मुलाच्या शिक्षणाचा सर्व खर्च पतीने करावा
-----------
शुल्लक कारणांवरून भांडण, एकमेकांवरील कमी झालेले प्रेम व विश्वास आणि आर्थिक स्वावलंबन नात्यांमध्ये दुरावा आणू शकते, याचे हे एक उदाहरण आहे. या दाव्यात पत्नी पतीचे कोणतेही म्हणणे ऐकून घेण्यास तयार नव्हती, तसेच अनेक अवास्तव मागण्या केल्या होत्या. या मागण्या फेटाळत न्यायालयाने घटस्फोट मंजूर केला.
-ॲड. मीनाक्षी डिंबळे, सुरेश यांच्या वकील