पुणे, ता. ९ : मुंबई-बंगळूर बाह्यवळण मार्गावरील नवले पूल परिसरात भरधाव ट्रकने धडक दिल्याने दुचाकीवरील सहप्रवासी तरुणाचा मृत्यू झाला. याप्रकरणी सिंहगड रस्ता पोलिसांनी ट्रकचालकाला अटक केली आहे.
या अपघातात अजित गोपाळ जवंडरे (वय २४, रा. चिंचोली राववाडी, जि. लातूर) याचा मृत्यू झाला. याप्रकरणी दुचाकीस्वार अभिषेक मोरे (वय २४, रा. महापूर, जि. लातूर) याने फिर्याद दिली आहे. त्यानुसार ट्रकचालक किशन देवीलाल नायक (वय ३०, रा. केरिया खेडा, राजस्थान) याच्याविरुद्ध गुन्हा दाखल केला आहे.
पोलिसांनी दिलेल्या माहितीनुसार, दुचाकीस्वार अभिषेक आणि अजित हे दोघेजण आठ जुलैला रात्री साडेअकराच्या सुमारास दुचाकीवरून बाह्यवळण मार्गावरून निघाले होते. त्यावेळी नवले पुलाजवळ पाठीमागून भरधाव ट्रकने दुचाकीला धडक दिली. यात अजित जवंडरे हा गंभीर जखमी झाल्याने त्याला रुग्णालयात दाखल केले; मात्र त्याचा मृत्यू झाला. उपनिरीक्षक एस. पी. पवार तपास पोलिस करीत आहेत.
-------