पुणे, ता. १० ः शहरामध्ये पावसाने गुरुवारी उघडीप दिली, परिणामी एक ते दोन अंश सेल्सिअसने कमाल तापमानात वाढ झाली आहे, तर पुढील दोन दिवस शहरासह जिल्ह्यात आकाश सामान्यतः ढगाळ राहील आणि पावसाच्या हलक्या सरी पडतील, असा अंदाज पुणे वेधशाळेने वर्तविला आहे.

विश्रांती घेतलेल्या पावसाने बुधवारी दुपारनंतर शहरासह जिल्ह्यात जोरदार बरसला, पण गुरुवारी दिवसभर पाऊस आला नसल्याने कमाल तापमानात वाढ झाली. पावसाचा जोर वाढणार अशी शक्यता असतानाच सकाळपासून हवामान कोरडे झाले. दिवसभर ऊन जाणवत असल्याने २८ ते २९ अंश सेल्सिअसवर असलेले कमाल तापमान ३२ अंश सेल्सिअसपर्यंत पोहोचले, परिणामी शहरात उकाडा जाणवू लागला.

मागील चोवीस तासांत कुरवंडे ४४ मिलिमीटर, भोर ३० मिलिमीटर, पाषाण २० मिलिमीटर, शिवाजीनगर १९ मिलिमीटर, तळेगाव १८ मिलिमीटर, एनडीए १४ मिलिमीटर, चिंचवड १२ मिलिमीटर, हडपसर आणि मगरपट्टा ९ मिलिमीटर, तर कोरेगाव पार्कमध्ये दोन मिलिमीटर पावसाची नोंद झाली.
-------------
चांगल्या पावसाची शेतकऱ्यांना प्रतीक्षा
राज्यातील विदर्भात पावसाचा जोर कायम असून, पुढील २४ तासात भंडारा, गडचिरोली, गोंदिया आणि नागपूर जिल्ह्यात मुसळधार ते अतिमुसळधार पावसाचा अंदाज हवामानशास्त्र विभागाने वर्तविला आहे. या सर्व जिल्ह्यांना ऑरेंज अलर्ट दिला आहे. पुणे, सातारा जिल्ह्यातील घाट विभागात मुसळधार पावसाचा अंदाज वर्तविण्यात आला आहे. मध्य महाराष्ट्रातील बहुतांश भागात पावसाचा जोर ओसरला आहे, घाट विभागातही पावसाचा जोर कमी झाला आहे. त्यामुळे शेतकरी चांगल्या पावसाची वाट बघत आहेत.