पुणे, ता. १५ : पुणे-सोलापूर महामार्गावरील शेवाळवाडी परिसरात भरधाव दुचाकीने धडक दिल्याने एका पादचाऱ्याचा मृत्यू झाला. शाहूराज लक्ष्मण बाराते (वय ४२) असे मृत्युमुखी पडलेल्याचे नाव आहे.
या प्रकरणी त्यांचा मुलगा पुरुषोत्तम बाराते (वय २०, रा. बनकर कॉलनी, हडपसर) याने फिर्याद दिली आहे. त्यानुसार हडपसर पोलिस ठाण्यात सोमवारी गुन्हा दाखल करण्यात आला. पोलिसांनी दिलेल्या माहितीनुसार, शनिवारी रात्री ११ वाजण्याच्या सुमारास शाहूराज बाराते हे पुणे-सोलापूर रस्त्यावरून पायी निघाले होते. या वेळी शेवाळवाडी पीएमपी स्थानकासमोर भरधाव दुचाकीने त्यांना धडक दिली. यात गंभीर जखमी झाल्याने त्यांना खासगी रुग्णालयात दाखल केले. परंतु उपचारादरम्यान त्यांचा मृत्यू झाला. अपघातानंतर दुचाकीस्वार पसार झाला. पोलिस उपनिरीक्षक अनिल बिनवडे तपास करीत आहेत.