पुणे, ता. १५ ः औंध आर्ट हेरिटेज आणि कलाकार चैतन्य कुलकर्णी यांच्यातर्फे साताऱ्यात तीन महिन्यांच्या प्रदीर्घ काळाच्या ‘फोटोस्टोरी’ या छायाचित्र प्रदर्शनाचे आयोजन करण्यात आले आहे. १२ जुलैपासून सुरू होणारे हे प्रदर्शन ३० सप्टेंबरपर्यंत साताऱ्यातील औंध संस्थानाच्या औंध आर्ट हेरिटेज येथे खुले असेल. या तीन महिन्यांच्या प्रदर्शनात विविध तज्ज्ञांची संवादसत्रेही होणार आहेत. २६ व २७ जुलैला मिलिंद ढेरे यांचे ‘प्रवास छायाचित्रण-रूपे आणि रचना’ या विषयावर आणि मयूरेश मोघे यांचे ‘कॅमेऱ्याविना छायाचित्रण’ या विषयावरील सत्र होणार आहे. ९ व १० ऑगस्टला राज शिंगे यांचे ‘कॅमेऱ्यामागील कलाकार’ या विषयावर आणि प्रकाश वाघमारे यांचे ‘छायाचित्रणाचे बदलते स्वरूप-इतिहास, वर्तमान आणि भविष्य’ या विषयावरील सत्र होणार आहे. या सत्रांसाठी नोंदणी आवश्यक असून इच्छुकांनी aahphotostory@gmail.com या ई-मेलवर संपर्क साधावा, असे आवाहन संयोजकांनी केले आहे.