पुणे, ता. १६ : औंध येथील साईश्री विटालाइफ हॉस्पिटलने युनिकॉन्डायलर गुडघा प्रत्यारोपणाची (पार्शल नी रिप्‍लेसमेंट) ही ‘टक्सप्लास्टी’ शस्त्रक्रिया यशस्वीपणे एका रुग्‍णावर केली. हॉस्पिटलचे अध्यक्ष व मुख्‍य रोबोटिक सांधेबदल शल्यविशारद डॉ. नीरज आडकर यांच्या नेतृत्वाखाली ‘क्युस्व्हस जॉइंट रोबोटिक सिस्टीम’च्या साहाय्याने करण्यात आली. महाराष्ट्रात प्रथमच अशी शस्त्रक्रिया केल्‍याची माहिती रुग्‍णालयाकडून देण्‍यात आली.

या प्रगत रोबोटिक तंत्रज्ञानामुळे रुग्ण एका महिन्याच्या आत पूर्णपणे बरा झाला असून, तिने नेहमीचे दैनंदिन जीवन पुन्हा सुरू केले आहे. अचूक निदान आणि अत्याधुनिक तंत्रज्ञानामुळे संपूर्ण गुडघा बदलण्याऐवजी केवळ दुखावलेला भागच बदलला गेला, त्यामुळे रुग्णाला कमी वेदना आणि जलद बरे होणे शक्य झाले. ही शस्त्रक्रिया वैद्यकीय दृष्टिकोन तसेच रुग्णाच्या अनुषंगानेही महत्त्वाची ठरली आहे. डॉ. आडकर आणि त्यांच्या पथकाने रुग्णाच्या गरजा लक्षात घेऊन वैयक्तिक उपचार विकसित केले असून ते काळजीपूर्वक केले जात असल्‍याची प्रतिक्रिया रुग्‍णाने दिली.