पुणे, ता. २१ : ‘राज्याला गृहमंत्री आहे का? असेल तर ते काय करीत आहेत?,’’ अशा शब्दांत पुणे शहरातील माजी आमदारांनी विधान भवन येथे घडलेल्या प्रकरणावर नाराजी व्यक्त केली आहे. विधिमंडळात जनहिताचे रक्षण करणे, जनताभिमुख धोरणे अमलात आणून राज्याचा विकास करणे ही कामे अपेक्षित असताना सध्या मात्र गंगा उलट्या दिशेने वाहू लागली आहे, असेही ते म्हणाले.

विधान भवनाच्या परिसरात आमदार गोपीचंद पडळकर आणि जितेंद्र आव्हाड यांच्या कार्यकर्त्यांमध्ये हाणामारी झाली. त्या घटनेनंतर माजी आमदार डॉ. कुमार सप्तर्षी, रामदास फुटाणे, ॲड. एल. टी. सावंत, माजी खासदार ॲड. वंदना चव्हाण आणि युवक क्रांती दलाचे सहकार्यवाह राहुल डंबाळे यांनी पत्रकार परिषद घेऊन घडलेल्या घटनेचा निषेध केला.

गोपीचंद पडळकर हे सरकार पक्षाचे प्रतिनिधित्व करतात. ते मुख्यमंत्र्यांचे खास, विशेष लाडके आहेत. सातत्याने विरोधी पक्षाच्या ज्येष्ठ नेत्यांना अर्वाच्य भाषेत लाखोली वाहणे हे त्यांच्यावर सोपविलेले काम ते निष्ठेने फार पाडत असतात, परंतु त्यांनी आता कळस गाठला. विधानसभेच्या सुरक्षित परिसरात ते नामचीन गुन्हेगारांना घेऊन आले. त्या गुंडांमार्फत विरोधी पक्षाच्या आमदारांच्या कार्यकर्त्यांवर हल्ला केला. मुख्यमंत्री आणि गृहमंत्री एकच आहेत. त्यांना हे रोखता आले नाही का? लोकशाहीचे मंदिर तोच उद्ध्वस्त करू शकतो, ज्याला ते मान्य नाही. जनतेच्या मूळ प्रश्‍नाकडे दुर्लक्ष केले जात आहे. बस्‌ झाले तुमचे हे नाटक, आता मूळ प्रश्‍नांकडे लक्ष द्या, अशी जनतेने त्यांना जाब विचारण्याची वेळ आली आहे, असेही हे आमदार म्हणाले.

--------