पुणे, ता. २१ ः गेल्या काही दिवसांपासून घाट विभागात पावसाचा जोर मंदावला होता. मात्र, पुढील दोन दिवसांत घाट विभागात मुसळधार पाऊस पडण्याची शक्यता भारतीय हवामानशास्त्र विभागाने वर्तविली आहे. त्यामुळे घाट विभागाला पुढील दोन दिवस ‘यलो’ अलर्ट देण्यात आला आहे. शहरात मात्र दोन दिवसांपासून हलक्या पावसाने हजेरी लावली आहे. पुढील तीन दिवस शहरात हवामानात फारसा बदल होणार नसून, तापमान स्थिर राहण्याची शक्यता हवामानशास्त्र विभागाने वर्तविली आहे.
शहर आणि परिसरात सोमवारी सकाळी ढगाळ वातावरण होते. मात्र, रात्री आठच्या सुमारास अचानक वातावरणात बदल होऊन हलक्या सरींनी हजेरी लावली. त्यामुळे वातावरणात गारवा निर्माण झाला. सोमवारी शहरात ३० अंश सेल्सिअस इतके कमाल तर २२.३ अंश सेल्सिअस इतके किमान तापमान नोंदविण्यात आले. घाट विभागात मंगळवारी (ता. २२) आणि बुधवारी (ता. २३) मुसळधार पाऊस पडण्याची शक्यता आहे. त्यामुळे घाट विभागाला पुढील दोन दिवस ‘यलो’ अलर्ट देण्यात आला आहे.
पुणे आणि परिसरात मंगळवारी (ता. २२) कमाल तापमान स्थिर राहणार असून, कमाल तापमान ३० अंश सेल्सिअस इतके, तर किमान तापमान २२ अंश सेल्सिअस नोंदविण्यात येणार आहे. आकाश अंशतः ढगाळ राहणार असून, अति हलक्या ते हलक्या स्वरूपाचा पाऊस पडण्याची शक्यता आहे. गुरुवारी (ता. २४) कमाल तापमानात किंचित घट होण्याची शक्यता आहे. कमाल तापमान २९ अंश सेल्सिअसपर्यंत नोंदविण्यात येणार असून, आकाश अंशतः ढगाळ राहून अति हलक्या ते हलक्या स्वरूपाचा पाऊस पडण्याची शक्यता हवामानशास्त्र विभागाने वर्तविली आहे.
-----------