आता निवडा जातीभेदापलीकडचे जोडीदार

राज्‍यात अंनिसतर्फे आंतरजातीय- धर्मीय वधू-वर सूचक केंद्र सुरू; नाव नोंदणीचे आवाहन

सातारा, ता. २२ : राज्यात आणि देशभरातील जातींमध्‍ये, धर्मांमध्‍ये मोठ्या प्रमाणात विद्वेष निर्माण केला जात आहे. त्यामुळे जाती आणि धर्माच्या पलीकडे जाऊन जोडीदार निवडण्याची इच्छा असणाऱ्यांना ते शोधणे अवघड झाले आहे. या पार्श्वभूमीवर जाती जातींमधल्या भिंती तोडण्यासाठीचा कृती कार्यक्रम म्हणून महाराष्ट्र अंधश्रद्धा निर्मूलन समितीच्या वतीने राज्यस्तरीय आंतरजातीय आंतरधर्मीय वधू- वर सूचक केंद्र सुरू करण्‍यात आले आहे.
या केंद्रामध्ये आंतरजातीय आंतरधर्मीय विवाह स्वेच्छेने करणाऱ्या वधू- वरांनी आणि पालकांनी नाव नोंदणी करावी, असे आवाहन या केंद्राचे राज्य समन्वयक शंकर कणसे, डॉ. ज्ञानदेव सरवदे यांनी केले आहे.
डॉ. नरेंद्र दाभोलकर हे ‘जात ही एक मोठी अंधश्रद्धा आहे’ असे म्हणत असत,‌ तसेच डॉ. बाबासाहेब आंबेडकरही आंतरजातीय विवाह मोठ्या प्रमाणात झाले, तर जाती निर्मूलन लवकर होईल, असे मानत. त्यानुसार गेली अनेक वर्षे अंधश्रद्धा निर्मूलन समिती आंतरजातीय, आंतरधर्मीय विवाह लावत त्‍यांच्‍यासाठी रहिमतपूर येथे सुरक्षित निवारा केंद्र सुरू केले आहे.
अंनिसच्या या केंद्रामध्ये वधू-वरांनी किंवा पालकांनी नोंदणी केल्यानंतर त्यांना सुयोग्य स्थळ सुचवले जाते. सत्यशोधकी, तसेच विशेष विवाह नोंदणी कायद्याच्‍या अंतर्गत विवाह करावा असा सल्ला दिला जातो. आंतरजातीय, धर्मीय विवाह स्वच्छेने करायचा असेल, तर त्यांना असे केंद्र कुठेही नाही. त्यामुळे अंनिसने ही सुविधा राज्‍यात पहिल्यांदाच उपलब्ध करून दिली आहे. या संदर्भाने कोणाला अनुरूप जोडीदार निवडायचा असल्‍यास अंनिसच्‍या गाव पातळीवरील कार्यकर्त्यांशी संपर्क साधण्‍याचे आवाहन अंनिसचे राज्‍य कार्यकारिणी सदस्य डॉ. हमीद दाभोलकर, राहुल थोरात, नंदिनी जाधव, प्रा. प्रवीण देशमुख, मिलिंद देशमुख, सम्राट हटकर, रामभाऊ डोंगरे, मुक्ता दाभोलकर, डॉ. अशोक कदम, राजीव देशपांडे, प्रकाश घादगिणे, मुंजाजी कांबळे, विनोद वायंगणकर, फारुख गवंडी, अण्णा कडलासकर यांनी केले आहे.
........................
येथे साधा संपर्क
आंतरजातीय, धर्मीय, तसेच विधवा- विधूर अशा विवाह करू इच्छिणाऱ्यांनी आपली माहिती या केंद्राचे समन्वयक शंकर कणसे (मु. पो. पिंपरी, ता. कोरेगाव, जि. सातारा) यांच्‍याशी (मोबा. ९९२२३ ५५४३५), डॉ. ज्ञानदेव सरवदे (बारामती) यांच्‍याशी (मोबा. ९५२७७२१४७५) संपर्क साधून पाठवावी.
........................................