पुणे, ता. २२ : पावसाळ्यात शहरातील रस्त्यांची चाळण होते. वर्षभर रस्त्यांवर अनेक ठिकणी खड्डे पडलेले असतात. रस्त्यांची कामे निकृष्ट दर्जाची होतात. पण नागरिकांना तक्रार करता येत नाहीत. त्यामुळे आता ‘पीएमसी रोड मित्र’ हे मोबाईल ॲप तयार केले आहे. त्याद्वारे फोटोंसोबत खड्ड्यांच्या ठिकाणचे अक्षांश आणि रेखांशही कळणार असून आयुक्तांचे यावर नियंत्रण असल्याने प्रशासनाला त्याची दखल घ्यावीच लागणार आहे. लवकरच या ॲपचे उद्‍घाटन होणार आहे.

शहरातील रस्त्यांच्या डांबरीकरणासाठी महापालिकेतर्फे दरवर्षी कोट्यवधी रुपये खर्च केले जातात. पण पावसाळा आली की रस्त्यांची चाळण होते, नवीन डांबरीकरण केलेल्या रस्त्यावरची खडी निघून जाते. अनेक ठिकाणी मोठमोठे खड्डे पडल्याने वाहतुकीचा खोळंबा होतो. शिवाय अपघात होऊन अनेक नागरिक जायबंदी होतात. नागरिकांना खड्डे दिसत असले तरी त्याची तक्रार करता येत नाही, तक्रार केली तरी त्याची दखल घेतली जात नाही, असा अनुभव पुणेकरांना वारंवार आला आहे.
नागरिकांना वापरण्यासाठी सोपे ॲप प्लेस्टोअरवरून डाऊनलोड करता येईल. नोंदविलेल्या तक्रारीची सद्यःस्थिती काय आहे, हे आयुक्तांसह पथ विभाग प्रमुखांनाही पाहता येणार आहे, असे पथ विभाग प्रमुख अनिरुद्ध पावसकर यांनी सांगितले.

‘पीएमसी रोड मित्र’ ॲपबाबत..
१) नागरिक दोन ते तीन फोटो, व्हिडिओ अपलोड करू शकतात
२) यात जुना फोटो अपलोड करता येणार नाही. नागरिकांना लाइव्ह फोटो अपलोड करावा लागणार
३) प्रशासनाला वस्तुस्थिती समजणार
४) फोटो अपलोड केल्यानंतर संबंधित कनिष्ठ अभियंत्याला तक्रार आपोआप मिळणार
५) खड्डा बुजविल्यानंतरचे फोटो त्या तक्रारीसोबत अपलोड करणे बंधनकारक
६) नागरिकांना त्याच्या तक्रारीची दखल घेतली आहे की नाही, हे समजणे शक्य होणार