पुणे, ता. २५ : जलजीवन मिशनमध्ये १.४० कोटींचे काम करूनही बिले अदा न केल्याने, तसेच या कामासाठी काढलेल्या ६० लाखांच्या कर्जाचे हप्ते भरू न शकल्याने कर्जबाजारी झालेला हर्षल पाटील या युवा कंत्राटदाराने आत्महत्या केल्याची घटना दुर्दैवी आहे. राज्यातील विविध विकासकामांमध्ये गुंतलेल्या कंत्राटदारांची सुमारे ९० हजार कोटी रुपयांची थकबाकी राज्य सरकारकडे प्रलंबित आहे. त्यामुळे सरकारने कंत्राटदारांची थकबाकी लवकर अदा करावी, या मागणीसाठी मुंबई उच्च न्यायालयात याचिका दाखल करणार असल्याचे बिल्डर्स असोसिएशन ऑफ इंडियाच्या (बीएआय) पदाधिकाऱ्यांनी स्पष्ट केले, तसेच मुंबईत तीव्र स्वरूपाच्या धरणे आंदोलनाचा इशाराही या वेळी देण्यात आला.
सांगलीच्या वाळवा तालुक्यातील तांदूळवाडी येथील हर्षल अशोक पाटील यांनी कर्जबाजारी होऊन आपली जीवनयात्रा संपवली. पाटील यांना श्रद्धांजली वाहण्यासाठी ‘बीएआय’तर्फे शोकसभेचे आयोजन केले होते. याप्रसंगी हर्षल पाटील यांच्या प्रतिमेस पुष्पहार अर्पण करून श्रद्धांजली वाहण्यात आली. या वेळी ‘बीएआय’ महाराष्ट्राचे अध्यक्ष जगन्नाथ जाधव, ‘बीएआय’ पुणेचे अध्यक्ष अजय गुजर, राज्य सचिव मनोज देशमुख, पुणे केंद्राचे उपाध्यक्ष महेश मायदेव व राजाराम हजारे, सचिव सी. एच. रतलानी, खजिनदार महेश राठी, माजी अध्यक्ष सुनील मते, डॉ. राजीव कृष्णानी, पुणे कॉन्ट्रॅक्टर असोसिएशनचे रवींद्र भोसले आदी उपस्थित होते.
----------------------