पुणे, ता. २५ : पाणंद, शिव रस्ते वापरास खुले करण्यासाठी हाती घेतलेल्या मोहिमेत आतापर्यंत ९२२ किलोमीटर लांबीचे ७०७ रस्ते खुले केले आहेत. त्याचा लाभ जिल्ह्यातील ३१ हजार शेतकऱ्यांना झाला आहे. गाव नकाशाप्रमाणे हे रस्ते खुले करून घेण्याकरिता नागरिकांनी तहसीलदार यांच्याकडे अर्ज करावा, असे आवाहन जिल्हा प्रशासनाने केले होते.
नकाशावर असलेले रस्ते, शीव व पाणंद रस्ते, सहमतीने तयार केलेले रस्ते, विशिष्ट कामांसाठी काही शासकीय विभागांनी केलेल्या रस्त्यांवर अतिक्रमण झाले आहे. काही रस्ते बंद झाले आहेत. ते खुले करण्याबरोबरच त्यांची नोंद तलाठ्यांच्या रेकॉर्डला घेण्याची मोहीम प्रशासनाने जानेवारीपासून हाती घेतली आहे. तसेच अशा रस्त्यांच्या देखभाल दुरुस्तीसाठी स्वतंत्र निधी उपलब्ध करून देण्याचा निर्णय जिल्हाधिकाऱ्यांनी घेतला आहे. या मेहिमेअंतर्गत आतापर्यंत एकूण ९२२.४२ किलोमीटर लांबीचे ७०७ रस्ते खुले केले असून, त्याचा लाभ सुमारे ३१ हजार १७२ शेतकरी घेत असल्याची माहिती उपजिल्हाधिकारी नामदेव टिळेकर यांनी दिली.
दरम्यान, जिल्हाधिकारी जितेंद्र डुडी यांनी सर्व तहसीलदारांना त्यांच्याकडील प्रलंबित अर्जांची माहितीदेखील मागविली आहे. तसेच या अर्जांवर तत्काळ कार्यवाही करण्याच्या सूचना दिल्या आहेत. तहसीलदारांकडे येणाऱ्या अर्जावर कालबद्ध पद्धतीने रस्ते खुले करण्याबाबतची कार्यवाही तत्काळ करण्याचा सूचना दिल्या आहेत. तसेच भूमी अभिलेखाच्या जिल्हा अधीक्षकांना परिपत्रकाद्वारे सूचना दिल्या आहेत. हे रस्ते वापरास खुले केल्यानंतर त्यांच्या मजबुतीकरणासाठी योग्य त्या तरतुदीनुसार संबंधित गटविकास अधिकाऱ्यांनी योग्य ती कार्यवाही करण्याच्या सूचना दिल्या आहेत.