पुणे, ता. २५ ः पुणे-सोलापूर महामार्गालगत मांजरी येथील उपबाजार परिसरात वाहतूक कोंडी टाळण्यासाठी महापालिकेतर्फे पुणे कृषी उत्पन्न बाजार समितीला अ‍ॅमिनिटी स्पेसची सुमारे दीड एकर जागा १० वर्षासाठी भाड्याने दिली जाणार आहे. यासाठीचा प्रस्ताव स्थायी समितीसमोर मंजुरीसाठी ठेवण्यात आला आहे. मोबदल्यात बाजार समितीतर्फे महापालिकेला पहिल्या वर्षी ९ लाख ८१ हजार ५३ रुपये भाडे मिळणार असून, दरवर्षी त्यात पाच टक्के वाढ केली जाणार आहे.
मांजरी उपबाजार हा शेतकरी ते ग्राहक या संकल्पनेवर आधारित असून, हवेली पूर्व, दौंड, शिरूर, बारामती, पुरंदर तालुक्यातून मोठ्या प्रमाणावर शेतीमाल येथे येतो. रोज या परिसरात सुमारे १५०० वाहने येतात. पण तेथील पार्किंगची जागा अपुरी पडत असल्याने अनेक वाहनचालक पुणे- सोलापूर महामार्गाच्या बाजूला गाड्या उभ्या करतात. त्यामुळे महामार्गावर वाहतुकीचा खोळंबा होत आहे. बाजार समितीने ऑक्टोबर २०२३ मध्ये उपमुख्यमंत्री अजित पवार यांच्याकडे महापालिकेची अ‍ॅमिनिटी स्पेसची जागा पार्किंगसाठी मिळावी अशी मागणी केली होती. त्यानुसार पवार यांनी महापालिकेला जागा देण्याचे निर्देश दिले होते. ही जागा केवळ शेतकरी, खरेदीदार आणि इतर संबंधित घटकांच्या वाहनतळासाठी वापरण्याची अट घालण्यात आली आहे.