पुणे, ता. २५ : लष्कर आणि कोंढवा परिसरात घरफोड्या करणाऱ्या सराईत गुन्हेगार टोळीतील तिघांना अटक केली. सीसीटीव्ही चित्रीकरण, तांत्रिक विश्लेषणाच्या आधारे पोलिसांनी ही कारवाई केली. हे आरोपी यापूर्वीही अनेक घरफोड्यांच्या गुन्ह्यांत सहभागी असल्याचे तपासात समोर आले आहे.
आर्यन अजय माने ऊर्फ मॉन्टी (वय २१, रा. हरपळे वस्ती, फुरसुंगी), विशाल मारुती आचार्य (वय २५, रा. रामटेकडी) आणि ओमकार सुरेश गोसावी (वय २२, रा. फुरसुंगी) अशी अटक केलेल्या आरोपींची नावे आहेत. आर्यन माने आणि ओमकार गोसावी हे सराईत गुन्हेगार असून, त्यांच्याविरोधात हडपसर, वानवडी आणि लोणीकंद पोलिस ठाण्यांत घरफोडीचे गुन्हे दाखल आहेत.
पोलिसांनी दिलेल्या माहितीनुसार, ईस्ट स्ट्रीटजवळील एका बॅंकेत १५ जुलै २०२५ रोजी एकजण कपाट उघडून कागदपत्रांची नासधूस करत होता. तिजोरी उचलून ठेवण्यात आली होती. या प्रकरणी लष्कर पोलिस ठाण्यात गुन्हा दाखल करण्यात आला होता. तपास पथकातील पोलिस अंमलदार लोकेश कदम आणि सागर हराळ यांनी लष्कर ते फुरसुंगी दरम्यानचे सीसीटीव्ही चित्रीकरण तपासले. तांत्रिक विश्लेषणातून आरोपींनी वापरलेले वाहन ओळखण्यात आले. त्यानंतर रामटेकडी, हडपसर व फुरसुंगी परिसरात सापळा रचून तिघा आरोपींना अटक करण्यात आली. आरोपींनी लष्कर परिसरासह कोंढव्यातही घरफोडी केल्याचे तपासात समोर आले. पोलिसांनी आरोपींकडून चोरीस गेलेला मुद्देमाल जप्त केला आहे.
----------