पुणे, ता. २८ ः सिरम इन्स्टिट्यूट ऑफ इंडियाचे अध्‍यक्ष व सायरस पूनावाला ग्रुपचे प्रमुख डॉ. सायरस एस. पूनावाला यांच्या हस्ते लुल्लानगर येथे कर्णबधिर मुलांसाठी असलेल्‍या शाळेच्या नव्या इमारतीचे उद्‍घाटन करण्यात आले. यावेळी भारतीय रेड क्रॉस सोसायटीचे अध्यक्ष डॉ. विक्रम फाटक, उपाध्यक्ष माब्रीन नानावटी, मानद सचिव प्रा. आर. व्ही. कुलकर्णी, सिरम इन्स्टिट्यूट ऑफ इंडियाच्या नेतृत्व पथकातील सदस्य आदी उपस्थित होते.
भारतीय रेड क्रॉस सोसायटीची ‘डॉ. सायरस एस. पूनावाला स्कूल फॉर हिअरिंग इम्पेअरड’ ही संस्था कर्णबधिर मुलांच्या शैक्षणिक प्रगतीसाठी कार्य करत आहे. अलीकडेच या शाळेला लुल्लानगर येथील ‘शताब्दी केंद्र’ या प्रशस्त परिसरात स्थलांतरित करण्यात आले असून, तिथे आधुनिक पायाभूत सुविधा आणि अत्याधुनिक तंत्रज्ञान उपलब्ध आहेत. या नव्या शाळेत कर्णबधिर मुलांसाठी सर्व आधुनिक सोयीसुविधा उपलब्ध आहेत. विलू पूनावाला फाउंडेशन या संस्थेने शाळेच्या सुविधा, संसाधने व शैक्षणिक कार्यक्रमांमध्ये सुधारणा करण्यास मदत केली आहे. या प्रसंगी डॉ. पूनावाला म्हणाले, “विशेष गरजांसह असलेल्या मुलांसाठी उत्तम आरोग्यसेवा उपलब्ध करून देताना व नव्या शाळेचे उद्‍घाटन करताना मला खूप समाधान वाटते. संस्थेच्या माध्यमातून आम्ही आमची संसाधने लोकांच्या हितासाठी योग्य दिशेने वापरण्याचा प्रयत्न करतो आणि ही शाळा त्याच दिशेने टाकलेले एक महत्त्वाचे पाऊल आहे.”

फोटो ः 35122