पुणे, ता. २८ : ज्येष्ठ शिक्षणतज्ज्ञ आणि ‘सिंबायोसिस’चे संस्थापक आणि अध्यक्ष डॉ. शां. ब. मुजुमदार यांच्या ९० व्या वाढदिवसाचे औचित्य साधून ‘सकाळ माध्यम समूहा’तर्फे त्यांच्या शिक्षण, सामाजिक आणि वैद्यकीय क्षेत्रातील मोलाच्या योगदानाचा गौरव करण्यासाठी येत्या बुधवारी (ता. ३०) विशेष सन्मान सोहळा आयोजित केला आहे. हा सोहळा राज्यपाल सी. पी. राधाकृष्णन यांच्या उपस्थितीत होणार आहे.
हा सन्मान सोहळा आणि ‘ज्ञानपर्व’ या विशेषांकाचे प्रकाशन राज्यपालांच्या हस्ते सेनापती बापट रस्त्यावरील सिंबायोसिस विश्व भवन हॉलमध्ये सकाळी अकराला होणार आहे. या कार्यक्रमाला खासदार श्रीमंत शाहू छत्रपती महाराज (कोल्हापूर) आणि सकाळ माध्यम समूहाचे व्यवस्थापकीय संचालक अभिजित पवार यांची प्रमुख उपस्थिती असणार आहे. डॉ. मुजुमदार यांनी आपल्या कार्यातून लाखो विद्यार्थ्यांच्या आयुष्यात ज्ञानाचा प्रकाश दिला आहे. देश-विदेशातील विद्यार्थ्यांमध्ये सामंजस्य आणि संवाद निर्माण करून शिक्षणाच्या सीमा रुंदावल्या आहेत. त्यांच्या कार्याला सलाम करण्यासाठी ‘सकाळ’तर्फे हा सन्मान सोहळा आयोजित करण्यात आला आहे. या कार्यक्रमात ‘सकाळ’तर्फे ‘ज्ञानपर्व’ या विशेषांकाचेही प्रकाशन होणार आहे.