पुणे, ता. ३० : गायक महंमद रफी यांची जन्मशताब्दी आणि त्यांच्या ४५ व्या पुण्यतिथीच्या पूर्वसंध्येला संवाद, पुणे आणि प्रतीक प्रकाशन यांच्यावतीने आयोजित कार्यक्रमात ज्येष्ठ सिनेपत्रकार, लेखक सुभाषचंद्र जाधव लिखित ‘स्वरसम्राट महंमद रफी’ या ग्रंथाचे प्रकाशन बुधवारी (ता. ३०) अभिनेते मोहन जोशी यांच्या हस्ते झाले. टाटा मोटर्सचे निवृत्त प्लांट हेड व्ही. गांधी, संवाद, पुणेचे अध्यक्ष सुनील महाजन, निकिता मोघे, प्रकाशक प्रवीण जोशी उपस्थित होते.
जोशी म्हणाले, ‘‘महंमद रफी हे केवळ महान गायकच नव्हे तर उत्तम व्यक्तीही होते. त्यांना प्रत्यक्ष भेटण्याची संधी मिळाली नाही, मात्र महंमद रफी यांच्यावरील पुस्तकाचे प्रकाशन करण्याचे भाग्य लाभले याचा आनंद आहे.’’
यानिमित्त गफार मोमीन, प्रज्ञा गौरकर यांचा महंमद रफी यांच्या गाजलेल्या गाण्यांवर आधारित सिनेसंगीताचा ‘सदाबहार रफी’ हा कार्यक्रम झाला. प्रकाशक प्रवीण जोशी यांनी मनोगत व्यक्त केले. चिन्मयी चिटणीस यांनी सूत्रसंचालन केले. निकिता मोघे यांनी आभार मानले.