पुणे, ता. ३१ : मागील तीन-चार महिन्यांपासून शिक्षण विभागाच्या नागपूर विभागातील बोगस शालार्थ प्रकरण सातत्याने चर्चेत आहे. या प्रकरणात काही अधिकाऱ्यांना आणि कर्मचाऱ्यांना कोणतीही चौकशी न करता अपमानास्पदरीत्या अटक करण्यात आली आहे. याचा महाराष्ट्र राज्य राजपत्रित अधिकारी महासंघाशी संलग्न असणाऱ्या अखिल महाराष्ट्र शिक्षण सेवा राजपत्रित अधिकारी संघाने निषेध केला आहे. तसेच, संघातर्फे राज्यभर शुक्रवारी (ता. १) एकदिवसीय सामूहिक रजा आंदोलन करण्यात येणार आहे. संघाच्या मागण्यांवर राज्य सरकारकडून लेखी आश्वासन न मिळाल्यास येत्या आठ ऑगस्ट रोजी बेमुदत सामूहिक रजा आंदोलन करण्यात येईल, असा इशारा संघाचे अध्यक्ष शेषराव बडे यांनी निवेदनाद्वारे दिला आहे.
बोगस शालार्थ आयडी देण्याचा गुन्हा केलेल्यांवर कायदेशीर कारवाई व्हावी, अशी संघाची मागणी आहे. प्रामाणिकपणे काम करणाऱ्या अधिकाऱ्यांना कायद्याने दिलेले संरक्षण नाकारून विनाचौकशी अटक झाल्याने शिक्षण विभागातील अधिकाऱ्यांमध्ये भीतीचे वातावरण निर्माण झाले आहे. शिक्षण विभागातील अधिकाऱ्यांना विभागाच्या परवानगीशिवाय विनाचौकशी अटकेपासून संरक्षणाची लेखी हमी राज्य सरकारकडून मिळत नाही, तोपर्यंत राज्यातील शिक्षण सेवेतील सर्व अधिकारी शुक्रवारी सामूहिक रजा आंदोलन करतील, असे बडे यांनी राज्य सरकारला दिलेल्या निवदेनात नमूद केले आहे.