पुणे, ता. ३ : रस्त्यांवर मोठ्या प्रमाणात असलेले खड्डे दुरुस्तीची गरज आहे. महापालिकेने तातडीने रस्ते दुरुस्तीची कामे सुरू करण्याची गरज आहे. उपनगरे व ग्रामीण भागातून येणाऱ्या भाविकांसाठी गणेशोत्सवाच्या काळात पीएमपी तसेच मेट्रो सेवा रात्रभर सुरू ठेवावी. भिडे पुलावरील काम अद्यापही पूर्ण झालेले नाही, उत्सवापूर्वी हे काम पूर्ण न केल्यास भाविकांची गैरसोय होईल, त्यामुळे संबंधित पुलावरील काम त्वरित पूर्ण करावे, अशी अपेक्षा गणेशोत्सव मंडळांच्या पदाधिकाऱ्यांनी ‘सकाळ’ने आयोजित केलेल्या बैठकीत केली.

पोलिसांनी गर्दी पांगविण्यासाठी रस्ते बंद करण्याची भूमिका घेऊ नये, याउलट पूर्व भागातील देखावे भाविकांना पाहता येतील, अशी व्यवस्था करावी. विसर्जन मिरवणूक मार्गावरील झाडांच्या फांद्या, झाडांवर लटकणाऱ्या बेकायदा केबल काढून टाकाव्यात, स्वच्छतागृहे, साफसफाईची चांगली व्यवस्था असावी. पोलिसांनी वाहतुकीचे व गर्दीचे चांगले व्यवस्थापन करण्यावर भर द्यावा, महापालिका, महावितरण कंपनी व पोलिस प्रशासनाने या उपाययोजना करण्यावर भर दिल्यास गणेशोत्सव अधिकाधिक चांगल्या पद्धतीने पार पडेल, अशा विविध प्रकारच्या सूचना गणेशोत्सव मंडळांनी बैठकीत केल्या.