पुणे, ता. ८ : जिल्ह्यातील खासगी आणि धर्मादाय रुग्णालयांच्या बिलांची तपासणी करण्याची मागणी जिल्हा परिषदेचे माजी पदाधिकारी आणि सदस्यांनी मुख्य कार्यकारी अधिकारी गजानन पाटील यांच्याकडे केली आहे.

जिल्हा परिषदेचे माजी उपाध्यक्ष रणजित शिवतरे, माजी सभापती शरद बुट्टे पाटील, प्रमोद काकडे, प्रताप पाटील, वीरधवल जगदाळे यांनी सोमवारी (ता. ७) पाटील यांना निवेदन देऊन ही मागणी केली. पुणे जिल्हा परिषदेच्या कार्यक्षेत्रातील रुग्णालयांची नोंदणी जिल्हा परिषदेच्या आरोग्य विभागाकडून केली जाते. अनेक रुग्णालये नोंदणी न करताच सुरू झाली आहेत. या सर्व रुग्णालयांकडून अनेकदा रुग्णांना अवाजवी बिले आकारली जातात. काहीवेळा पैसे नाहीत म्हणून रुग्णांना उपचार नाकारले जातात. त्यासाठी जिल्हा परिषदेच्या आरोग्य विभागात नागरिकांच्या याबाबतच्या अडचणी सोडविण्यासाठी हेल्पलाइन असावी, त्याचबरोबर उपचार आणि बिलांसंबंधी येणाऱ्या तक्रारींचे निवारण करणे, बिलांचे परीक्षण करण्यासाठी प्रशासनाची एक समिती असली पाहिजे. गरज नसलेली औषधे देखील रुग्णांना खरेदी करण्यास भाग पाडले जाते. तक्रार आल्यास अशा वैद्यकीय बिलांची तपासणी करण्याची व्यवस्था करण्याची मागणी ही निवेदनाद्वारे करण्यात आली आहे.