पुणे, ता. ५ : मोबाईल आणि टीव्हीपासून मुलांना दूर ठेऊन वॉटर कलर लँडस्केप वर्कशॉप, नारदीय कीर्तन प्रशिक्षण वर्ग व बुद्धिबळ वर्ग असे तीन उपक्रम वारजे येथील ज्येष्ठ नागरिक सामाजिक प्रतिष्ठान आणि वारजे साहित्यिक कट्ट्यातर्फे विनामूल्य घेण्यात आले.
हे शिबिर ८ ते १४ वर्षे वयोगटांतील मुलांसाठी होते. यामध्ये चित्रकार शरद जतकर यांनी मुलांना मार्गदर्शन केले. नारदीय कीर्तनाचा प्रशिक्षण वर्ग शैलजा जतकर यांनी घेतला. मुलांनी पारंपरिक पोशाखात कीर्तन सादर केले. सुधीर बराटे यांनी मुलांना बुद्धिबळाच्या खेळातील नियम, डावपेच समजावून सांगितले. या उपक्रमासाठी संघांचे अध्यक्ष डी. के. जोशी व पदाधिकाऱ्यांनी परिश्रम घेतले. बाबासाहेब धुमाळ, दीपाली धुमाळ, माधवी वैद्य यांनी मुलांना मार्गदर्शन केले.