पुणे, ता. ७ ः शहरात प्रवेश करणाऱ्या प्रत्येक रस्त्यावर शेकडो बेकायदा होर्डिंग आहेत, पण महापालिकेच्या अधिकारी, कर्मचाऱ्यांना ‘अर्थ’पूर्ण कारभारामुळे बेकायदा होर्डिंग दिसत नाहीत. तात्पुरती कारवाई करून, प्रश्‍नांचे गांभीर्य कमी केले जाते, पण होर्डिंग पडण्याच्या घटनेची पुनरावृत्ती झाल्यावरच महापालिका वठणीवर येईल, अशा शब्दांत शहरातील बेकायदा होर्डिंगवर नागरिकांनी आपला संताप व्यक्त केला आहे.
पावसाळ्याच्या पार्श्‍वभूमीवर शहरात बेकायदा होर्डिंग पडण्याची घटना नुकतीच घडलेली असतानाही महापालिकेच्या आकाशचिन्ह व परवाना विभागाकडून ठोस कारवाई केली जात नसल्याची सद्यःस्थिती आहे. आकाशचिन्ह व परवाना विभागाने केवळ २० बेकायदा होर्डिंग असल्याचा अजब दावा केला होता. त्याबाबतचे वृत्त ‘सकाळ’मध्ये प्रसिद्ध झाल्यानंतर संबंधित विभागाने दोन दिवस तोंडदेखली कारवाई करत, ११ बेकायदा होर्डिंग जमीनदोस्त केले. त्यानंतर बेकायदा होर्डिंग विरुद्धची कारवाई पुन्हा एकदा थंडावल्याची चिन्हे आहेत. दरम्यान, बेकायदा होर्डिंगबाबत नागरिकांनी ‘सकाळ’कडे संतप्त प्रतिक्रिया नोंदविल्या आहेत.

भूषण गोरे ः बेकायदा होर्डिंगकडे महापालिकेचा कायम काणाडोळा असतो. आर्थिक फायदा होत असल्यामुळे जाणीवपूर्वक दुर्लक्ष केले जात आहे.
राजेश बेल्हेकर ः शहराच्या चारही दिशांना मोठ्या प्रमाणात बेकायदा होर्डिंग आहेत. शहरात ‘होर्डिंग माफिया’ तयार होत आहे. तरीही, महापालिकेला ते दिसत नाही, हे पुणेकरांचे दुर्दैव आहे. अधिकारी व कर्मचारी मिळून या बेकायदा व्यवसायातून पैसा मिळवत आहेत.

एक नागरिक ः महापालिका प्रशासनातील कर्मचारी चिरीमिरी घेऊन, मोठमोठे होर्डिंग उभे करत आहेत. सर्वसामान्य नागरिकांना ते दिसतात. मात्र, महापालिकेच्या अधिकाऱ्यांना ते दिसत नाही. त्यामुळे नागरिकांनी स्वतः बेकायदा होर्डिंगची छायाचित्रे काढून महापालिका व ‘सकाळ’कडे द्यावीत. जे बेकायदा होर्डिंग उभारणी करतात व त्यांना जे अधिकारी व कर्मचारी मदत करतात, अशा व्यक्ती व कर्मचाऱ्यांवर २१ हजार रुपयांच्या दंडाची कारवाई करावी.

किरण गुळुंबे ः शहरात मोठ्या प्रमाणात बेकायदा होर्डिंग, फ्लेक्‍सबाजी सुरू आहे. महापालिकेचा आकाशचिन्ह विभाग तात्पुरती व दिखाऊ कारवाई करतो. काही ठिकाणी बेकायदा फ्लेक्‍स, होर्डिंग हटविले जाते, मात्र त्यासाठीचा बांबू, लोखंडापासून तयार केलेला सांगाडा तसाच ठेवला जातो. त्यामुळे त्याच ठिकाणी पुन्हा एकदा बेकायदा फ्लेक्‍स, होर्डिंग उभारण्यासाठी व्यावसायिकांना मोकळे रान मिळते.

नागरिक ः बाणेर येथील कळमकर चौकामध्ये मोठमोठे होर्डिंग आहेत. त्याच्यावरील जाहिराती फाटून अक्षरशः कागद रस्त्यावरील चौकात येऊ लागला आहे. त्यामुळे वाहतुकीस अडथळा निर्माण होत असून, अपघात होण्याची दाट शक्‍यता आहे. तरीही, महापालिकेचे त्याकडे लक्ष नाही.

श्रीपाद शिंगवेकर ः सिंहगड रस्ता, दांडेकर पूल या ठिकाणी मोठ्या प्रमाणात अतिक्रमणे झाल्याने रस्ता अरुंद झाला आहे. त्यातच या परिसरात मोठ्या प्रमाणात बेकायदा फ्लेक्‍स लावले जातात. अतिक्रमण विभाग व आकाशचिन्ह विभागाने त्याची पाहणी करून कारवाई करावी.

महेश भोसले ः पुणे व पिंपरी-चिंचवडमध्ये यापूर्वी होर्डिंग कोसळून नागरिकांचा जीव गेला आहे. महापालिकेचा आकाशचिन्ह विभाग पुन्हा त्याच घटनेच्या पुनरावृत्तीची वाट पाहतो आहे का? महापालिकेच्या अधिकारी व कर्मचाऱ्यांनाच कसे बेकायदा होर्डिंग दिसत नाहीत. आता नागरिकांनी अधिकारी व कर्मचाऱ्यांना त्यांचे बोट धरून बेकायदा होर्डिंग दाखवायचे का?''
---------
बातमी क्‍लिप ः बेकायदा होर्डिंगबाबतचे वृत्त २९ मे रोजी टुडे मेन आहे.
.