हडपसर, ता. ३० : हडपसरसह जेजुरी परिसरात घरफोडी करणाऱ्या तीन विधिसंघर्षित बालकांना हडपसर पोलिसांनी ताब्यात घेतले आहे. त्यांच्याकडून तीन लाख पंचाऐंशी हजारांचा मुद्देमाल जप्त करण्यात आला आहे. मागील दोन महिन्यांत वेळोवेळी त्यांनी घरफोड्या केल्या आहेत.
हडपसर पोलिस ठाण्याच्या हद्दीत मागील काही दिवसांमध्ये घरफोडीच्या गुन्ह्यांमध्ये वाढ झाली होती. त्याअनुषंगाने परिमंडळ ५ चे पोलिस उपायुक्त डॉ. राजकुमार शिंदे यांच्या मार्गदर्शनाखाली वरिष्ठ पोलिस निरीक्षक संजय मोगले, पोलिस निरीक्षक नीलेश जगदाळे यांनी तपास पथक अधिकारी व अंमलदार यांचे पथक तयार करून घरफोडी झालेल्या ठिकाणांची माहिती संकलित केली. त्याआधारे तपासाची दिशा ठरवण्यात आली होती. तपास पथकाकडून केलेल्या सीसीटीव्ही विश्लेषणातून, तसेच पेट्रोलिंगच्या माध्यमातून तीन विधिसंघर्षित बालकांना ताब्यात घेतले आहे.
त्यांच्याकडे केलेल्या तपासात त्यांनी मागील दोन महिन्यांच्या कालावधीमध्ये वेळोवेळी घरफोडी केली असल्याचे निष्पन्न झाले आहे. त्यांच्याकडून हडपसर परिसरात दोन, तर जेजुरी परिसरात एक अशा तीन ठिकाणी घरफोडी केल्याचे उघड झाले आहे. पोलिसांनी त्यांच्याकडून ३४.८ ग्रॅम वजनाचे सोन्याचे दागिने, दोन लॅपटॉप व एक मोटारसायकल असा तीन लाख पंचाऐंशी हजार रुपये किमतीचा मुद्देमाल हस्तगत केला आहे.
...................................