वाघोली, ता. २१ : मर्सिडीज आणि स्विफ्ट मोटार अपघातानंतर मर्सिडीजमधील कुटुंबीयांना मारहाण केल्याप्रकरणी वाघोली पोलिस ठाण्यात चार जणांवर गुन्हा दाखल करण्यात आला आहे.
आदेश बाळासाहेब लोहोट (वय ३२, रा. चंदननगर), भरत हरी पोळ (वय १९, रा. चिखली), वैष्णवी रेश्मा मुसळे (वय २२, रा. चंदननगर) आणि आरती शिंदे (वय २३, रा. केसनंद) यांच्यावर गुन्हा दाखल केला आहे. याप्रकरणी चालक विनोद सदाशिव कानडे (वय ३२, रा. वाघेश्वरनगर, वाघोली) यांनी फिर्याद दिली.
चालक विनोद हे कोथापल्ली यांच्या १० वर्षांच्या मुलाला घरी सोडण्यासाठी जाताना स्विफ्ट मोटारीने मर्सिडीजला पाठीमागून धडक दिली. स्विफ्ट मोटारीमधील चौघांनी चालक विनोदला मारहाण करण्यास सुरुवात केली. मोटारीच्या काचा फोडल्या. मालक अरविंद कोथापल्ली, त्यांची पत्नी वर्षा आणि नातेवाईक विशाल वर्मा व अनुराग वर्मा हे तेथे आल्यानंतर त्यांनाही शिवीगाळ करून मारहाण केली. तसेच, नुकसानभरपाई न दिल्यास मुलाचे अपहरण करण्याची धमकी दिली. ही घटना वाघोलीतील पानमळा परिसरात घडली. या प्रकरणी रविवारी रात्री उशिरा गुन्हा दाखल करण्यात आला.