औंध, ता. २९ : औंध, औंधरस्ता, बोपोडी, खडकीरस्ता परिसरातील रस्त्यांवर मोठ्या प्रमाणात खड्डे पडले असून वाहतूक कोंडी, अपघात होत आहेत. याबाबत निवेदन देऊनही औंध, बाणेर क्षेत्रीय कार्यालयामार्फत कार्यवाही होत नसल्यामुळे, रस्त्यावरील खड्ड्यांमध्येच राष्ट्रवादी काँग्रेस शरदचंद्र पवार पक्षातर्फे वृक्षारोपण करण्यात येणार आहे.
येत्या शुक्रवारी (ता. १) हे आंदोलन करणार असल्याचे पक्षाचे प्रदेश सरचिटणीस, प्रवक्ते सुनील माने यांनी सांगितले. याबाबत त्यांनी औंध-बाणेर क्षेत्रीय कार्यालयाचे सहायक आयुक्त गिरीश दापकेकर यांना पत्र देऊन वृक्षारोपण आंदोलनास उपस्थित राहण्याची विनंती केली आहे.
‘‘औंध, बोपोडी, खडकी परिसरात मोठ्या प्रमाणात रस्त्यावर खड्डे पडलेले आहेत. या खड्डेयुक्त रस्त्यांमुळे या भागात वारंवार अपघात होत आहेत. तसेच रस्त्यांमधील खड्ड्यांमुळे या परिसरात नेहमी वाहतूक कोंडी होत आहे. रस्त्यातील खड्डे बुजवावेत अशी विनंती आम्ही पक्षाच्या‌ वतीने शनिवारी (ता. २६) सहायक आयुक्तांना पत्राद्वारे केली होती. मात्र याबाबत कोणत्याही प्रकारची कार्यवाही अद्यापपर्यंत केलेली नाही. त्यामुळे येथे आम्ही या खड्ड्यांमध्ये वृक्षारोपण करीत आहोत. या वृक्षारोपण कार्यक्रमासाठी आपण उपस्थित राहावे, आपल्या हस्ते काही खड्ड्यात वृक्षारोपण व्हावे यासाठी शुक्रवारी (ता. १) सकाळी ११ वाजता कार्यक्रमास उपस्थित राहण्याची विनंती सहायक आयुक्तांना पत्राद्वारे केली आहे,’’ माने यांनी सांगितले.