विश्रांतवाडी, ता. २४ : ‘माझ्या बॉयफ्रेंडला मेसेज का केला’, या क्षुल्लक कारणावरून येरवडा परिसरात दोन मुलींच्या गटात चांगलाच राडा झाला. येथील एका शाळेच्या परिसरात शुक्रवारी रात्री साडेदहा सुमारास ही घटना घडली. या घटनेचा व्हिडिओ समाजमाध्यमात झपाट्याने व्हायरल झाला.

शाळेतील एका मुलीने सुरुवातीला ‘माझ्या मित्राच्या मोबाईलवर तू संदेश का पाठविला,’ असा जाब दुसऱ्या मुलीला विचारला. त्यामुळे दोघींमध्ये वाद सुरू झाला. या वादाचे पर्यावसान हाणामारीत झाले. काही वेळातच या वादात आणखी मुली सहभागी झाल्या आणि दोन गटांमधील मुलींमध्ये एकमेकांचे केस ओढणे, लाथाबुक्क्या, शिव्यांचा भडिमार सुरू झाला.

शाळेच्या आवारातच झालेली ही भांडणे पाहून नागरिक थबकले. मुलींच्या हातघाईच्या भांडणामुळे परिसरात काही वेळ गोंधळाचे वातावरण निर्माण झाले. या प्रकारामुळे परिसरातील पालक आणि नागरिकांनी नाराजी व्यक्त केली. ‘शाळेच्या आवारात असे प्रकार घडत असतील, तर मुलांच्या संस्कार आणि सुरक्षिततेचा प्रश्न उभा राहतो,’ अशी प्रतिक्रिया स्थानिक नागरिकांनी व्यक्त केली. याबाबत माहिती घेऊन योग्य कारवाई करण्यात येईल, असे वरिष्ठ पोलिस निरीक्षक रवींद्र शेळके यांनी सांगितले.