मार्केट यार्ड, ता. २८ : पुणे कृषी उत्पन्न बाजार समितीचे उपसभापती दत्तात्रेय पायगुडे यांनी पदाचा राजीनामा दिला आहे. सभापती प्रकाश जगताप यांनी तो स्वीकारला आहे. याआधी ७ जुलै रोजी सभापती दिलीप काळभोर यांनीही पदाचा राजीनामा दिला होता. त्यानंतर १८ जुलैला प्रकाश जगताप यांची सभापतीपदी निवड झाली. आता उपसभापती पायगुडे यांनीही पद सोडल्याने पुन्हा एकदा बदल होत आहे.
पायगुडे हे १३ सप्टेंबर २०२४ रोजी उपसभापती झाले होते. संचालक मंडळ आल्यापासून ते तिसरे उपसभापती होते. आता बाजार समितीला चौथे उपसभापती मिळणार आहेत. उपसभापती पदासाठी प्रशांत काळभोर, शशिकांत गायकवाड, नानासाहेब आबनावे आणि मनिषा हरपळे हे इच्छुक आहेत.