पुणे : मायदेशापासून कोसो दूर लंडनमध्ये होते. परंतु, कोरोनामुळे तेथेही लॉकडाऊन घोषित झाला. हातातील नोकरी गेली, जवळचे पैसेही संपले अन व्हिसाची मुदतही संपली. देशात परतायचे होते, परंतु वारंवार अर्ज करूनही उपयोग होत नव्हता. मात्र, राष्ट्रवादी युवक कॉंग्रेसचे पुणे शहर सरचिटणीस गिरीश गुरनानी यांनी टाकलेल्या फेसबुक पोस्टवरून त्यांना संपर्क साधला अन सूत्रे वेगाने हलली. त्यामुळे मला मायदेशी परतता आले, अशा शब्दांत यशा पालनकर हिने आपल्या भावना व्यक्त केल्या. 

एेकलंत का? आळंदीत चोरून लावले जात आहे लग्न

लॉकडाउनमुळे काही दिवसांपासून लंडनमध्ये अडकलेले भारतीय विद्यार्थी दोन दिवसांपूर्वी अखेर मायदेशी परतले. गौरांग तांदुलवडकर, यश साली व यशा पालनकर (महाराष्ट्र), रिषभ सरसुनिया (दिल्ली), आयुष भुतानी व नवदीप जंगीर (राजस्थान) हे त्यातील काही विद्यार्थी. यातील तीन जण पुण्यातील आहेत. 

परतीच्या प्रवासाबद्दल यशा म्हणाली, ""लंडनमध्ये स्थलांतराचा अर्ज भरूनही कोणताच प्रतिसाद मिळत नव्हता. दोन महिन्यांपूर्वी व्हिसाची मुदत संपत आली होती. मी परतीच्या प्रवासासाठी खूप प्रयत्न केले. भारतीय दुतावासाकडून "आम्ही प्रयत्नांत आहोत' इतकेच उत्तर मिळत होते. तीन-चार विमान येऊन गेली; परंतु यादीत माझे नाव येतच नव्हते. माझी नोकरी गेली अन जवळचे पैसेही संपले. त्यामुळे काय करावं, हे समजतच नव्हतं.'' 

दरम्यान, गुरनानी यांची फेसबुकवरील पुण्यातील काही विद्यार्थ्यांच्या स्थलांतराबाबतची पोस्ट वाचली अन मी त्यांच्याशी संपर्क साधला. त्यानंतर गुरनानी यांनी खासदार सुप्रिया सुळे, राष्ट्रवादी युवा कॉंग्रेसचे राष्ट्रीय अध्यक्ष धीरज शर्मा यांच्याशी त्वरित संपर्क साधला. या सर्वांच्या प्रयत्नांमुळे माझे नाव स्थलांतरित प्रवाशांच्या यादीत आले अन अखेर आम्ही मायभूमीमध्ये परतलो, असे यशाने भावुक होत सांगितले. 
पुण्यावरून या आठ शहरांसाठी सुरू झाली विमानसेवा

लंडनमध्ये अडकलेल्या विद्यार्थ्यांनी फेसबुकद्वारे संपर्क साधून मदतीसाठी विनंती केली. त्यानंतर मी त्वरित ट्‌वीटरद्वारे सुप्रिया सुळे आणि धीरज शर्मा यांना माहिती कळविली. त्यानंतर त्यांना मायदेशी आणण्यासाठी वेगाने पावले उचलण्यात आली. - गिरीश गुरनानी, 
पुणे शहर सरचिटणीस, राष्ट्रवादी युवक कॉंग्रेस