हिंजवडी - जागतिक दर्जाच्या राजीव गांधी माहिती तंत्रज्ञान उद्यानातील इन्फोसिस कंपनी परिसरातील शेकडो वृक्षांची बेसुमार कत्तल करण्यात आली आहे. घटनेला १५ दिवस उलटूनही एमआयडीसीकडून संबंधितांवर कारवाई केली नसल्याने हिंजवडी, माण परिसरातील पर्यावरणप्रेमींनी त्याचा निषेध केला. 

कत्तल केलेल्या झाडांची लाकडे वाहून नेणारा टेंपो मुळशी वनविभागाच्या अधिकाऱ्यांनी ताब्यात घेतला असून, त्याच्यावर कारवाई करणार असल्याचे वनअधिकारी पोपटराव कापसे यांनी सांगितले. 

इन्फोसिसने इन्फोटेक पार्कच्या दुसऱ्या फेजमध्ये मुख्य रस्त्यालगत हजारो झाडे लावली आहेत. गेल्या दहा वर्षांपासून ती जतन केल्याने इन्फोसिसचा परिसर सुशोभित झाला होता.

दरम्यान, वनविभागाने वृक्षतोडीचा पंचनामा केला असून, याबाबत पुढील कार्यवाही करण्यासाठीचा अहवाल एमआयडीसीकडे पाठविला असल्याचे कापसे यांनी सांगितले. 

याबाबत एमआयडीसीचे वरिष्ठ अधिकारी म्हणाले, की वनविभागाने केलेल्या कारवाईचा अहवाल अद्याप प्राप्त झाला नाही. अहवाल येताच वरिष्ठ कार्यालयाच्या सूचनांनुसार दोषींवर कारवाई करण्यात येईल.

होर्डिंगसाठी वृक्षतोड
हिंजवडी, माण परिसरात अनेक कंपन्या व ग्रामपंचायतीतर्फे दरवर्षी हजारो रोपांची लागवड केली जाते. मात्र, मुख्य रस्त्यालगत उभारलेल्या बेकायदा होर्डिंगसाठी शेकडो झाडांची कत्तल करीत असल्याचे चित्र आहे. यावर प्रशासनाने कारवाई करावी, अशी मागणी पर्यावरणप्रेमी माणचे माजी उपसरपंच संदीप साठे यांनी केली.