पुण्याच्या कोरेगाव-भीमा या ठिकाणी झालेल्या दंगल प्रकरणी पुण्याच्या माजी पोलीस आयुक्त रश्मी शुक्ला (Rashmi shukla) चौकशीसाठी आयोगासमोर हजर झाल्या. यावेळी त्यांची तब्बल सहा तास चौकशी करण्यात आली. याआधी परमबीर सिंग यांनाही समन्स बजावण्याचे आदेश देण्यात आले होते. चौकशी आयोगाचे वकील आशिष सातपुते यांनी संबंधित अर्ज केला होता. कोरेगाव भीमाला हिंसाचार झाला, त्यावेळी परमबीर सिंगअतिरिक्त पोलीस महासंचालक होते. तर रश्मी शुक्ला पुण्याच्या पोलीस आयुक्त पदावर होत्या. आता या प्रकरणात आयपीएस विश्वास नांगरे पाटील यांनाही चौकशीसाठी बोलावण्यात आलं आहे. हिंसाचारावेळी ते कोल्हापूर परिक्षेत्राचे तत्कालीन पोलीस महानिरीक्षक होते.

२०१८ मध्ये झालेल्या दंगलीत झालेल्या हिंसाचारानंतर राज्य सरकारने या प्रकरणी कोलकाता हायकोर्टाचे निवृत्त मुख्य न्यायाधीश जे. एन. पटेल (High court) यांच्या अध्यक्षतेखालील आणि महाराष्ट्राचे माजी मुख्य सचिव सुमित मलिक यांच्या नेतृत्वाखालील चौकशी आयोग नेमला आहे. या आयोगाकडून सध्या शुक्ला यांची साक्ष नोंदवण्यात आली.

दरम्यान, मुंबईचे माजी पोलीस आयुक्त परमबीर सिंग यांनाही समन्स बजावण्यात आले होते, परंतू ते हजर झाले नाहीत. त्यावेळी सिंग हे अतिरिक्त पोलिस महासंचालक (कायदा व सुव्यवस्था) या पदावर होते. शुक्ला यांनी मात्र आयोगासमोर हजेरी लावली. तसेच शपथपत्र दाखल करण्यासाठी वेळ मागितला. या कार्यक्रमाबाबत पुणे पोलिसांकडून काही कागदपत्रे मिळणे बाकी असल्याचं त्यांनी आयोगापुढं सांगितलं होतं.