पुणे : राज्यात मुख्यमंत्री रोजगार निर्मिती योजनेंतर्गत येत्या पाच वर्षांत एक लाख सूक्ष्म आणि लघू उद्योगांच्या माध्यमातून 10 लाख रोजगाराच्या संधी उपलब्ध करून देण्याचे उद्दिष्ट आहे, अशी माहिती पुणे विभागाचे उद्योग सहसंचालक सदाशिव सुरवसे यांनी दिली.

ताज्या बातम्यांसाठी डाऊनलोड करा ई-सकाळचे ऍप

विभागीय आयुक्त कार्यालय आणि महाराष्ट्र उद्योजकता केंद्र (एमसीईडी) शिवाजीनगर यांच्या वतीने मुख्यमंत्री रोजगार निर्मिती कार्यक्रमांतर्गत विभागीय कार्यशाळेच्या उद्‌घाटन विभागीय आयुक्त डॉ. दीपक म्हैसेकर यांच्या हस्ते झाले. या वेळी सुरवसे म्हणाले, युवक-युवतींना स्वावलंबी बनविण्यासाठी त्यांचे स्वयंरोजगार प्रकल्प राज्य सरकारच्या आर्थिक सहाय्यातून उभारण्यात येणार आहेत. त्यासाठी मुख्यमंत्री रोजगार निर्मिती योजना राबविण्यात येत आहे.

डॉ. म्हैसेकर म्हणाले, मोठ्या प्रमाणावर रोजगार निर्मिती होण्यासाठी स्थानिक तरुणांना स्वयं-रोजगाराकडे आकर्षित करुन सूक्ष्म व लघू उपक्रम स्थापित करणे हा मुख्यमंत्री रोजगार निर्मिती कार्यक्रम योजनेचा उद्देश आहे. ही योजना प्रभावीपणे राबविण्यासाठी सर्व विभागांनी समन्वयाने काम करावे. युवा वर्गात उद्योजकतेची प्रेरणा निर्माण होण्यासाठी महत्वाकांक्षी मुख्यमंत्री रोजगार निर्मिती कार्यक्रम प्रभावीपणे राबविण्याच्या सूचना त्यांनी दिल्या.

उपायुक्त (महसूल) प्रताप जाधव, संगणकतज्ज्ञ विजय जाधव, उद्योग संचालनालयाचे उद्योग अधिकारी सुरेश लोंढे, पी. डी. रेंदाळकर, बँक ऑफ महाराष्ट्रचे सहायक सरव्यवस्थापक अभिनव काळे, एमसीईडीचे विभागीय अधिकारी मदनकुमार शेळके, यू.डी. क्षीरसागर आदी उपस्थित होते.