Pune News : पीएमपी बसमध्ये चढत असताना चालकाने बसचा अचानक वेग वाढवून एका महिलेला फरफटत नेले. ही घटना डॉ. बाबासाहेब आंबेडकर रस्त्यावरील लाल देऊळ बसस्थानकाजवळ सोमवारी घडली.

शमशुमनिसा हुसेन खान (वय ५७, रा. जुना मोदीखाना) असे जखमी झालेल्या महिलेचे नाव आहे. या महिलेने बंडगार्डन पोलिस ठाण्यात फिर्याद दिली आहे. त्यावरून अज्ञात बसचालकाविरुध्द गुन्हा दाखल केला आहे. ही पीएमपी बस कोंढव्यातून पुणे स्टेशनकडे जात होती. बस लाल देऊळ बसस्थानकावर थांबल्यानंतर ही महिला बसमध्ये चढत होती.

त्यावेळी चालकाने महिलेकडे दुर्लक्ष करून अचानक बसचा वेग वाढवला. काही अंतरापर्यंत महिलेला फरफटत नेले. त्यामुळे ही महिला गंभीर जखमी झाली. चालक कानात हेडफोन घालून बस चालवत होता. पोलिस बसचालकाचा शोध घेत आहेत.