पुणे - विकसित देशांनी अणुशक्ती विषयी जगात भिती निर्माण करून ठेवली आहे. मात्र जर जगातील विषमता कमी करायची असेल तर सर्वांना समान उर्जा मिळणे गरजेचे आहे. त्यासाठी जगाला अणुशक्ती शिवाय पर्याय नाही, असे प्रतिपादन अणुऊर्जा शास्त्रज्ञ पद्मविभूषण डॉ. अनिल काकोडकर यांनी केले.

सावित्रीबाई फुले पुणे विद्यापीठातील विज्ञान शिक्षण आणि संप्रेषण केंद्रात ‘क्लायमेट चेंज : ग्लोबल वॉर्मिंग’ या प्रदर्शनाचे आणि डॉ. ए. पी. जे. अब्दुल कलाम सभागृहाचे उद्धाटन कार्यक्रमाचे आयोजन करण्यात आले होते. या समारोहात प्रमुख पाहुणे म्हणून डॉ. काकोडकर बोलत होते. अध्यक्षस्थानी विद्यापीठाचे कुलगुरू डॉ. सुरेश गोसावी होते.

यावेळी विद्यापीठाचे माजी कुलगुरू डॉ. नितिन करमरकर, प्रभारी कुलसचिव डॉ. विजय खरे, विज्ञान शिक्षण आणि संप्रेषण केंद्राचे समन्वयक डॉ. राजेंद्र देवपूरकर आदी उपस्थित होते.

डॉ. काकोडकर म्हणाले, ‘अणुशक्तीचा शोध लागला तेव्हा त्यांची ओळख विध्वंसक शक्ती म्हणून होती. मात्र याचा उपयोग वीजनिर्मिती, शेती, कॅन्सरचा उपचार यांसारख्या लोकहीताच्या कामांसाठीही होत असतो. अणुशक्तीमुळे विकसित जग आणि विकसनशील-मागास जग अशी जगाची विभागणी झाली आहे.

त्यामुळे जगात विषमता वाढली आहे. ही विषमता नष्ट करायची असेल तर नागरिकांचे राहणीमान सुधारण्याची गरज आहे. त्यासाठी परदेशात उपलब्ध असलेली उर्जा आपल्याला मिळणे आवश्यक आहे.’

कुलगुरू डॉ. गोसावी यांनी विज्ञान शिक्षण आणि संप्रेषण केंद्राच्या स्थापनेमागील संकल्पना समजावून सांगितली. प्रास्ताविक डॉ. राजेंद्र देवपूरकर यांनी तर सुत्रसंचालन मृदृला कर्णी यांनी केले.